రాజమౌళి నుంచి వస్తున్న మరో క్రేజీ ప్రాజెక్ట్.. త్రిబుల్ ఆర్. 2021కి ఇదే బిగ్గెస్ట్ రిలీజ్. రాజమౌళి సినిమా, అందులోనూ ఎన్టీఆర్ – రామ్ చరణ్ల మల్టీస్టారర్. ఈ సినిమాపై అంచనాలు ఏ రేంజులో ఉంటాయో ప్రత్యేకంగా చెప్పాల్సిన పనిలేదు. గురువారం మేకింగ్ వీడియోని సైతం విడుదల చేయబోతోంది చిత్రబృందం. ఈ మేకింగ్ వీడియో నుంచే ప్రమోషన్ కార్యక్రమానికి శ్రీకారం చుట్టబోతోంది.
రాజమౌళి ఏం చేసినా.. భారీగానే ఉంటుంది. తన ప్రయత్నాలూ, ప్రయోగాలూ – కొత్త తరహాలో సాగుతుంటాయి. దానికి తగ్గట్టే ఆర్.ఆర్.ఆర్ ప్రమోషన్లు వినూత్నంగా చేయడానికి ప్రయత్నిస్తున్నట్టు టాక్. ఆర్.ఆర్.ఆర్ కోసం ఓ ప్రమోషనల్ గీతాన్ని రూపొందించబోతున్నారని టాక్. ఈ పాటలో.. నటీనటులతో పాటు టెక్నీషియన్స్ అంతా కనిపిస్తారు. ఆడియోలో ఈ పాట ఉండదు. కేవలం ఎండ్ టైటిల్స్ పైనే రాబోతోంది. అంతేకాదు. రాజమౌళి తన హీరోలందరినీ ఈ పాటలో చూపించాలని భావిస్తున్నాడట. అంటే ప్రభాస్, రవితేజ, సునీల్, నాని, నితిన్.. ఇలా రాజమౌళి తో పనిచేసిన హీరోలందరూ స్క్రీన్ పై కనిపించే అవకాశం ఉంది. రాజమౌళి అడిగితే.. ఏ హీరో అయినా `నో` అని ఎందుకు చెబుతాడు? అయితే ఈ పాటని ప్రమోషనల్ గీతంగా మాత్రమే వాడతారు. ఇప్పటికే… కీరవాణి ఓ మంచి ట్యూన్ సిద్ధం చేశాడని, త్వరలోనే ఈ పాటని తెరకెక్కించే అవకాశం ఉందని సమాచారం. ఆర్.ఆర్.ఆర్ షూటింగ్ దాదాపుగా పూర్తయ్యింది. మరో రెండు పాటలు చిత్రీకరించాలని చిత్రబృందం చెబుతోంది. ఆ పాటలో ఇదొకటి కావొచ్చు.
