‘మగధీర’ తరవాత.. చిరు ఫ్యామిలీతో రాజమౌళి పనిచేయలేదు. ఇక ఎప్పటికీ పనిచేయడన్న రీతిలో వార్తలు గుప్పుమన్నాయి. దానికి తగ్గట్టు రాజమౌళి ప్రవర్తన కూడా మెగా ఫ్యామిలీకి యాంటీ అన్నట్టే కనిపించేది. అయితే… ఈమధ్య చిరు ఫ్యామిలీతో జక్కన్న కలివిడిగానే ఉంటున్నాడు. చిరంజీవి 151వ సినిమా ‘సైరా’ మోషన్ పోస్టర్ రాజమౌళి చేతుల మీదుగా విడుదలైంది. మొన్నటికి మొన్న రంగస్థలం సెట్కి కూడా వెళ్లొచ్చాడు. రాజమౌళి – రామ్ చరణ్ కాంబోలో మరో సినిమా రావడం ఖాయమన్న రీతిలో ప్రచారం జరుగుతోంది.
అయితే ఈలోగా సైరాకు కావల్సిన సలహాలూ సూచనలూ… రాజమౌళి అందిస్తున్నట్టు టాక్. విజువల్ ఎఫెక్ట్స్, సెట్స్ విషయంలో చిరు బృందం రాజమౌళి సలహాలు తీసుకొంటోందని సమాచారం. రాజమౌళికి ఇలాంటి విషయాలపై మంచి గ్రిప్ ఉంది. బాహుబలి విజువల్ ఎఫెక్ట్స్ అంతర్జాతీయ ప్రమాణాలతో రూపొందించాడు. ఆ సమయంలోనే అంతర్జాతీయ గ్రాఫిక్స్ సంస్థల గురించి సమగ్ర సమాచారం రాబట్టాడు రాజమౌళి. ఎక్కడెక్కడ ఎలాంటి వీఎఫ్ఎక్స్ పనులు జరుగుతాయో.. రాజమౌళికి బాగా తెలుసు. ఆ సమాచారాన్ని సైరాకి అంద జేశాడట. లైవ్ యాక్షన్, సెట్స్.. వీటిపై రాజమౌళి తన అనుభవాన్ని సైరా టీమ్ తో పంచుకొన్నాడని తెలుస్తోంది. సైరాని అంతర్జాతీయ ప్రమాణాలతో, చిరు కెరీర్లోనే ది బెస్ట్ సినిమాగా మలచాలన్నది చిత్రబృందం తపన. అందుకే రాజమౌళి సహాయాన్ని తీసుకోవడానికి వెనుకాడడం లేదు. రాజమౌళి కూడా.. తన వంతు సహాయం అందిస్తూనే ఉన్నాడు. ఈ సలహాలు సైరాకి ఎంత హెల్ప్ అవుతుందో చూడాలి.
