హీరోగా ఎంట్రీ ఇచ్చి నటించిన మూడు సినిమాల్లో రెండు సినిమాలను హిట్ చేసుకున్న హీరో సాయి ధరం తేజ్. మెగా అభిమానులను అతి తక్కువ కాలంలో తన బుట్టలో వేసుకున్నాడు. అయితే దిల్ రాజు బ్యానర్ లో ప్రస్తుతం సుప్రీం సినిమా చేస్తున్న సాయి తన తర్వాత సినిమా కూడా దిల్ రాజు చేస్తున్నాడంటూ వార్తలు వచ్చాయి. అంతేకాదు ఆ సినిమాకు నూతన దర్శకుడు సతీష్ వేగ్నేష్ దర్శకత్వం వహిస్తున్నాడని అన్నారు.
అయితే సడెన్ గా ఏమైందో ఏమో ఆ ప్రాజెక్ట్ సాయి చేతుల నుండి యువ కెరటం రాజ్ తరుణ్ చేతికి వచ్చింది. ‘శతమానం భవతి’ అనే అచ్చమైన తెలుగు టైటిల్ తో వస్తున్న ఈ సినిమా దిల్ రాజు ఎంతో ప్రతిష్టాత్మకంగా నిర్మిస్తున్నాడు. త్వరలో షూటింగ్ ప్రారంభం కానున్న ఈ సినిమా ఈ సంవత్సరం దసరా బరిలో విడుదల చేయనున్నారు.
వరుస విజయాలతో ఫుల్ ఫాంలో ఉన్న రాజ్ తరుణ్ రీసెంట్ రిలీజ్ సీతమ్మ అందాలు రామయ్య సిత్రాలు కాస్త నిరాశ పరచినా అవకాశాలు మాత్రం వెళ్లువల్లా వచ్చి పడుతున్నాయి. దిల్ రాజు బ్యానర్ లో సినిమా తర్వాత రాజ్ తరుణ్ గీతా ఆర్ట్స్ బ్యానర్ లో అల్లు అరవింద్ నిర్మాణంలో కూడా ఓ సినిమా చేయనున్నాడు.
