నర్సాపురం ఎంపీ రఘురామకృష్ణంరాజుకు సొంత పార్టీతో ఏర్పడిన విబేధాలు.. మరో రేంజ్కు వెళ్తున్నాయి. ఆయన తన ప్రాణానికి ముప్పు ఉందని.. రక్షణ కల్పించాలని..నేరుగా తన పర్సనల్ సెక్రటరీ ద్వారా ఎస్పీకే ఫిర్యాదు విజ్ఞప్తి చేశారు. ఈ మేరకు ఓ లేఖను ఎస్పీకి పంపి.. దాన్ని మీడియాకు విడుదల చేశారు. ఎంపీకే రక్షణ లేని పరిస్థితులు ఎందుకు వచ్చాయి… ఎవరి వల్ల ప్రాణాలకు ముప్పు ఉందో.. ఆ వివరాలన్నింటినీ లేఖలో.. పేర్కొన్నారు. వైసీపీ అధినాయకత్వంతో ఏర్పడిన విబేధాల కారణంగా.. ఆయనను ఇతర వైసీపీ నేతలు.. తమకు మాత్రమే సాధ్యమయ్యే “ట్రేడ్ మార్క్” విమర్శలు చేస్తున్నారు. అందులో దిష్టిబొమ్మలు తగుల బెట్టడం దగ్గర్నుంచి జిల్లాలో ఎలా తిరుగుతారో చూస్తారనే హెచ్చరికల వరకూ ఉన్నాయి.
తాడేపల్లి గూడెం ఎమ్మెల్యే కొట్టు సత్యానారాయణను హఠాత్తుగా వైసీపీ అనుకూల మీడియా ఇంటర్యూలు చేస్తోంది. అందులో తీవ్రమైన హెచ్చరికలు ఉంటున్నాయి. వైసీపీ నేతలకు.. ఎవరిపై ..ఎప్పుడు.. ఏం మాట్లాడాలో.. ఎలాంటి చర్యలకు పాల్పడాలో.. పై నుంచి స్పష్టమైన దిశానిర్దేశం వస్తుందన్న ప్రచారం ఉంది. ఈ విషయం బాగా తెలుసేమో కానీ.. తనపై దాడులు జరుగుతాయని.. రఘురామకృష్ణం రాజు అనుమానిస్తున్నారు. అందుకే.. సొంత పార్టీ నేతల వల్లనే తనకు ప్రాణహాని ఉందని.. రక్షణ కావాలని లేఖ పంపారు. తన దిష్టిబొమ్మలు తగులబెట్టి.. అసభ్యకరంగా మాట్లాడుతున్న వైసీపీ కార్యకర్తలు, నాయకులపై ఉండి, ఆచంట, ఆకివీడు, తాడేపల్లిగూడెం పోలీస్ స్టేషన్లలో ఫిర్యాదు చేసినా… ఎవరూ పట్టించుకోలేదని ఎంపీ తన సెక్రటరీ ద్వారా పంపిన లేఖలో.. పేర్కొన్నారు.
నియోజకవర్గంలో తిరగాలంటే రక్షణ కల్పించాలని కోరారు. వైసీపీ నుంచి గెలిచిన రఘురామకృష్ణంరాజు.. అదే పార్టీ కార్యకర్తలు… నేతల వద్ద నుంచి ప్రాణహాని ఉందనే ఆరోపణలు చేయడం వరకూ.. రాజకీయం మారింది. ఇది అంతకంతకూ పెరుగుతోంది కానీ తగ్గడం లేదు. వైసీపీ అగ్రనేతలు.. ఎప్పటికప్పుడు రఘురామకృష్ణంరాజుపై చర్యలు తీసుకుంటామని ప్రకటిస్తున్నారు కానీ.. ఎలాంటి చర్యలు తీసుకోలేకపోతున్నారు.
