సినిమాలని చెక్కడంలో రాజమౌళి రూటే వేరు. ఆయనకు జక్కన్న అనే ముద్దుపేరు కూడా వుంది. బాహుబలి నుంచి ఆయన శైలిలో ఇంకా మార్పు వచ్చేసింది. సినిమా విడుదల కావడానికి ఏళ్ళు గడిచిపోతుంటాయి. అయితే ఇప్పుడు రాజమౌళి ట్రాక్ రికార్డ్ ని మించిపోయారు సుకుమార్. ఆయన పుష్ప2 సినిమా అఫీషియల్ గా వాయిదా పడింది. డిసెంబర్ 6 కొత్త డేట్.

అయితే ఇది మామూలు వాయిదా కాదు. మామూలు లేటు కూడా కాదు. ఓ రికార్డ్ బ్రేకింగ్ వాయిదా. బాహుబలి రికార్డ్ ని బ్రేక్ చేసిన లేటు. 10 జూలై 2015 బాహుబలి1 వచ్చింది. 28 ఏప్రిల్ 2017న బాహుబలి 2ని కూడా ప్రేక్షకులు ముందుకు తీసుకొచ్చేశారు. దీన్నే చాలా ఆలస్యంగా ఫీలయ్యారు ఫ్యాన్స్. కానీ ఇప్పుడు పుష్ప విషయంలో సుకుమార్ ఆలస్యం మామూలుగా లేదు.17 డిసెంబర్ 2021 వచ్చింది పుష్ప. పుష్ప2 తాజా డేట్ ప్రకారం 6 డిసెంబర్ 2024. అంటే దాదాపు మూడేళ్ళ సమయం తీసుకున్నారు.

బాహుబలి అంటే విజువల్స్ ఎఫెక్ట్స్, యుద్ధాలు, ఎపిక్ యాంబియన్స్.. ఇలా బోలెడు వర్క్. పుష్ప సోషల్ సినిమానే. ఆ వరల్డ్ ఎలా వుంటుందో క్లారిటీ వుంది. మరి సుకుమార్ ఏం ప్లాన్ చేస్తున్నారు, ఎంత గ్రాండ్ గా ప్లాన్ చేస్తున్నారో కానీ బాహుబలికి మించిపోయింది షూటింగ్ టైమ్.

నిజానికి పుష్ప 2 షూటింగ్ ఎప్పుడో మొదలైయింది. అల్లు అర్జున్ ఈ సినిమాకే అంకితమైపోయివున్నాడు. షూటింగ్ లో అనుకోని అవంతరాలు వచ్చిన సందర్భాలు కూడా లేవు. మరి ఎంతలా తీస్తున్నారో కానీ ఈ వాయిదా కొంతమంది ఫ్యాన్స్ ని నిరాశ పరిస్తే.. వాయిదా పడినా పర్లేదు.. సినిమా మాత్రం తగ్గేదేలే అని ఇంకొందరు కామెంట్లు పెడుతున్నారు.