ఆగ‌స్టు 15న రావాల్సిన సినిమా ‘పుష్ష 2’. అనుకొన్న సమ‌యానికి ‘పుష్ష 2’ వ‌చ్చేస్తే, ఈ పాటికి ఆ సినిమా సాధించిన వ‌సూళ్లు, తిరగ‌రాసిన రికార్డుల గురించి మాట్లాడుకొనేవాళ్లంతా. అయితే అనివార్య కార‌ణాల వ‌ల్ల డిసెంబ‌రు 6కి వాయిదా ప‌డింది. ఆరోజైనా ‘పుష్ష 2’ వ‌స్తుందా, రాదా? అనే విష‌యంపై స‌ర్వ‌త్రా చ‌ర్చ న‌డుస్తోంది. సుకుమార్ చాలా స్లో అని, అనుకొన్న స‌మ‌యానికి అవుట్ పుట్ ఇవ్వ‌లేడ‌ని, ఈ సినిమాని 2025కి వాయిదా వేయ‌డం ఖాయ‌మ‌ని గుస‌గుస‌లాడుకొంటున్నారు. దీనిపై మైత్రీ మూవీస్ క్లారిటీ ఇచ్చింది. తామంతా ప‌క్కా ప్లాన్‌తో ఉన్నామ‌ని, ప‌నుల‌న్నీ స్పీడ‌ప్ చేస్తున్నామ‌ని, డిసెంబ‌రు 6న ‘పుష్ష 2’ రావ‌డం ఖాయ‌మ‌ని డిక్లేర్ చేసింది. అంతే కాదు. ఒక‌రోజు ముందు, అంటే డిసెంబ‌రు 5న ప్రీమియ‌ర్లు కూడా వేస్తున్నామ‌ని ప్ర‌క‌టించింది.

సెప్టెంబ‌రు 2 నాటికి ఫ‌స్టాఫ్ ఎడిటింగ్ వెర్ష‌న్ పూర్తి చేస్తామ‌ని, అక్టోబ‌రు 6 క‌ల్లా సెకండాఫ్ కూడా అయిపోతుంద‌ని, న‌వంబ‌రు 20కి కాపీ పూర్త‌వుతుంద‌ని నిర్మాత ర‌వి తెలిపారు. ”న‌వంబ‌రు 25కి సెన్సార్ కూడా పూర్తి చేస్తాం. మ‌రోరెండు పాట‌లు ఇవ్వాల్సివుంది. అక్టోబ‌రులో ఒక‌టి, న‌వంబ‌రులో మ‌రో పాట విడుద‌ల చేస్తాం” అని క్లారిటీగా చెప్పేశారు. వినాయ‌క చ‌వితికి ‘పుష్ష 2’ నుంచి ఎలాంటి అప్‌డేట్ రాక‌పోవొచ్చు. ప్ర‌స్తుతం రామోజీ ఫిల్మ్ సిటీలో క్లైమాక్స్ స‌న్నివేశాల్ని తెర‌కెక్కిస్తున్నారు. దీంతో పాటు ఓ రెండు పాట‌ల చిత్రీక‌ర‌ణ బాకీ ఉంది.