ప్ర‌భాస్ తో సినిమా అంటే దాదాపు రెండేళ్ల ప్ర‌యాణం. ఈలోగా త‌నతో సినిమా పూర్తి కాదు. ఎందుకంటే ప్ర‌భాస్ అంటే భారీ హంగులు ఉండాలి. ఇప్పుడు తాను చేసే ప్ర‌తీ క‌థా… వీఎఫ్ఎక్స్ తో ముడి ప‌డి ఉంటోంది. అందుకోస‌మైనా అద‌న‌పు స‌మ‌యం కేటాయించాల్సివ‌స్తోంది. కాక‌పోతే.. ప్రీ ప్రొడక్ష‌న్ ప్లానింగ్ ప్ర‌కారం సాగితే మేకింగ్ స‌మ‌యాన్ని ఆదా చేసుకోవొచ్చు. ఇప్పుడు ప్ర‌శాంత్ వ‌ర్మ అదే చేస్తున్నాడు.

ప్ర‌శాంత్ వ‌ర్మ ద‌ర్శ‌క‌త్వంలో ప్ర‌భాస్ ఓ సినిమాలో న‌టిస్తున్న సంగ‌తి తెలిసిందే. బ్ర‌హ్మ‌రాక్ష‌స్ ని వ‌ర్కింగ్ టైటిల్ గా అనుకొంటున్నారు. ర‌ణ‌వీర్ సింగ్ చేయాల్సిన క‌థ ఇది. అటు తిరిగి ఇటు తిరిగి ప్ర‌భాస్ చేతికి చేరింది. ప్ర‌భాస్ తో ఓ సినిమా చేయ‌బోతున్నా అని ప్ర‌శాంత్ వ‌ర్మ ఎప్పుడో హింట్ ఇచ్చేశాడు. కానీ ఆ త‌ర‌వాత అంతా సైలెంట్ అయిపోయింది. దాంతో ఈ ప్రాజెక్ట్ ఉంటుందా, లేదా? అనే అనుమానాలు వ్య‌క్తం అయ్యాయి.

ప్ర‌శాంత్ వ‌ర్మ కూడా చాలా కాలంగా సైలెంట్ గా ఉన్నాడు. కానీ ఈ గ్యాప్ లో ‘బ్ర‌హ్మ‌రాక్ష‌స్‌’కు సంబంధించిన ప్రీ ప్రొడ‌క్ష‌న్ ప‌నులు పూర్తి చేసేశాడు. మ‌రీ ముఖ్యంగా ఈ సినిమాకు సంబంధించిన ప్ర‌తీ సీన్‌, ప్ర‌తీ షాట్… ప్రీ విజువ‌లైజేష‌న్ చేయించేశాడు. ఇప్పుడు త‌న ద‌గ్గ‌ర స్క్రిప్టు ప్రీ విజువ‌లైజేష‌న్ రూపంలో ప‌క్కాగా ఉంది. ఏ షాట్ ఎలా తీయాలి? అనేది ముందే డిసైడ్ చేసేశాడు. దీని వ‌ల్ల మేకింగ్ లో స‌మ‌యం ఆదా అవుతుంది. సెట్ కి వెళ్లి ఏం చేయాలి? ఎలా తీయాలి? అనేది ఆలోచించ‌కుండా ముందే.. సినిమా ప్రీ ప్రొడ‌క్ష‌న్ లోనే చూసేసుకొంట‌ర‌న్న‌మాట‌. నేప‌థ్య సంగీతం కూడా ముందే డిజైన్ చేసుకోవొచ్చు. ఎడిటింగ్ పేట్ర‌న్ ఏమిట‌న్న‌ది అర్థం అవుతుంది. దాంతో స‌మయం, డ‌బ్బు ఆదా అవుతాయి. ప్ర‌భాస్ చేతిలో ఇప్పుడు చాలా సినిమాలున్నాయి. వాటిలో అతి త‌క్కువ స‌మ‌యంలో బ్ర‌హ్మ‌రాక్ష‌స్ ని పూర్తి చేయాల‌న్న‌ది ప్ర‌శాంత్ వ‌ర్మ ప్లాన్‌. అందుకు త‌గ్గ‌ట్టే ప్ర‌ణాళిక‌లు సిద్ధం చేస్తున్నాడు. ఈయేడాది చివ‌ర్లో ఈ చిత్రాన్ని లాంఛ‌నంగా ప్రారంభించే అవ‌కాశం ఉంది. ఆ వెంట‌నే రెగ్యుల‌ర్ షూటింగ్ కూడా మొద‌లైపోతుంది.