గత వారం విడుదలైన ‘మత్తు వదలరా’ మంచి టాకే తెచ్చుకుంది. కానీ వసూళ్లు మాత్రం అంత ఆశాజనకంగా లేవు. మరోవైపు ఈ సినిమాకి పబ్లిసిటీ తీసుకురావడానికి చిత్రబృందం తన వంతు కృషి చేస్తూనే ఉంది. రాజమౌళి తో ట్వీట్లు చేయించి కాస్త ఊపు తెచ్చింది. రాజమౌళితో చేసిన స్పెషల్ ఇంటర్వ్యూ కూడా బయటకు వచ్చేసింది. సుకుమార్ లాంటి వాళ్లు ముందు నుంచీ ఈసినిమాని తమ భుజాన వేసుకుని మోస్తున్నారు. ఇప్పుడు బ్రహ్మాస్త్రాన్ని కూడా సంధించేశారు.
ప్రభాస్ ఈ సినిమాకి సాయం పట్టడానికి ముందుకొచ్చాడు. ఈ సినిమాని ప్రభాస్ చూశాడు. అంతేకాదు, చిత్రబృందాన్ని అభినందించాడు కూడా. ఇందుకు సంబంధించిన ఓ వీడియోని చిత్రబృందం విడుదల చేయనుంది. ప్రభాస్ బైట్లు, తన మాటలు, ప్రశంసలు… ఈ సినిమాకి కొత్త ప్రచారాన్ని తీసుకురాడం ఖాయం. అయితే.. ప్రేక్షకుల మూడ్ సంక్రాంతి సీజన్పై ఉంది. సంక్రాంతికి విడుదలవుతున్న సినిమాల గురించి, వాటి మధ్య ఉన్న పోటీ గురించి ఆసక్తిగా చర్చించుకుంటున్నారు. ఈ సమయంలో.. మిగిలిన సినిమాలపై దృష్టి పెట్టడం కష్టమే. కానీ.. ‘మత్తు వదలరా’ టీమ్ తన వంతు ప్రయత్నాలు మాత్రం ఇలా చేస్తూనే ఉంది.
