ప్రభాస్ – మారుతి కాంబోలో ‘రాజాసాబ్’ రూపుదిద్దుకొంటున్న సంగతి తెలిసిందే. ‘కల్కి’ తరవాత ప్రభాస్ నుంచి వచ్చే సినిమా ఇదే. దాదాపు 40 శాతం షూటింగ్ పూర్తయ్యింది. సంక్రాంతికి ఫస్ట్ లుక్ విడుదల చేశారు. అప్పటి నుంచీ ఎలాంటి అప్డేట్ లేదు. ఒక్క పాట కూడా బయటకు రాలేదు. అయితే ఇప్పుడు చిత్రబృందం ఓ గ్లింప్స్ని విడుదల చేయాలని ప్లాన్ చేస్తోంది. ఈనెలాఖారులోగా ఈ గ్లింప్స్ని వదలాలని చూస్తున్నారు. ప్రభాస్ మాస్ ఎంట్రీతో ఈ లుక్ డిజైన్ చేశారని సమాచారం. ఇందులో ప్రభాస్ ఒక్కడే కనిపిస్తాడు. మిగిలిన పాత్రల ఎంట్రీ ఉండదని తెలుస్తోంది.
ఓవైపు కల్కి, మరోవైపు సలార్.. వీటి మధ్య ప్రభాస్ అప్పుడప్పుడూ ‘రాజాసాబ్’కు డేట్లు ఇస్తూ వెళ్లాడు. అయితే ఇప్పుడు ఈ రెండు సినిమాలూ పూర్తయ్యాయి. ‘కల్కి’ రిలీజ్కు ముందే ప్రభాస్ ఇటలీ వెళ్లిపోయాడు. ఈనెలాఖరులోగా ఆయన ఇండియా తిరిగొస్తారు. వచ్చాక నేరుగా ‘రాజాసాబ్’ షూటింగ్ లో పాలు పంచుకొంటారు. ఈ సందర్భంగానే ‘రాజాసాబ్’ గ్లింప్స్ విడుదల చేస్తే బాగుంటుందని చిత్రబృందం ఆలోచన. ఇప్పటి వరకూ ప్రభాస్ లేని సన్నివేశాలన్ని మారుతి పూర్తి చేసేశాడని, ప్రభాస్ తో ముడిపడిన సీన్లే బాకీ ఉన్నాయని తెలుస్తోంది. ఈ సినిమాకు తమన్ సంగీతాన్ని అందిస్తున్న సంగతి తెలిసిందే. ఇప్పటి వరకూ ఆయన 4 పాటల్ని రెడీ చేసేశారు. అందులో ‘రాజాసాబ్’ టైటిట్ ట్రాక్ కూడా ఉంది. ఈ గ్లింప్స్లో ఈ టైటిల్ ట్రాక్ వినిపించబోతోంది.
