ఆరడుగుల హైట్, హైట్కు తగ్గ పర్సనాలిటీ, పర్సనాలిటీకి తగ్గ వాయిస్….ఇవన్నీ కలిసి ఉన్న అసలు సిసలైన టాలీవుడ్ హీరో యంగ్ రెబల్ స్టార్ ప్రభాస్. హీరోగా వెండితెరపై బాహుబలిగా తిరుగులేని ఇమేజ్ను సంపాదించుకున్నారు. తెలుగు సినిమా హీమాన్గా.. తెలుగు సినిమా గర్వంగా చెప్పుకునే రెబల్స్టార్గా ప్రభాస్ ఎదగడం వెనుక ఎంతో కృషి వుంది. మరెంతో పట్టుదల వుంది. అనుకున్న లక్ష్యాన్ని రీచ్ అవడానికి వేసిన ప్రతి అడుగులో ఇంకెంతో దీక్ష వుంది. కృషి, పట్టుదల, దీక్ష.. ఈ మూడూ ప్రభాస్ని కోట్లాది మంది అభిమానించే రెబల్స్టార్ని చేశాయి.
రెబల్స్టార్ కృష్ణంరాజు నటవారసుడుగా ‘ఈశ్వర్’ చిత్రంతో హీరోగా పరిచయమై అనతికాలంలోనే తన నటనతో అందరి మన్ననలు పొందారు. ‘రాఘవేంద్ర’, ‘వర్షం’, ‘అడవిరాముడు’, ‘చక్రం’, ‘ఛత్రపతి’, ‘పౌర్ణమి’, ‘యోగి’, ‘మున్నా’ ‘బుజ్జిగాడు’ ‘బిల్లా’, ‘ఏక్నిరంజన్’, ‘డార్లింగ్’, ‘మిస్టర్ పర్ఫెక్ట్’, ‘రెబల్’, ‘మిర్చి’ వంటి విభిన్నమైన చిత్రాలు చేసి అన్నివర్గాల ప్రేక్షకుల హృదయాల్లో సుస్థిర స్థానాన్ని సంపాదించుకున్నారు యంగ్ రెబల్స్టార్ ప్రభాస్.
ఇంటర్నేషనల్ హీరో..
బాహుబలి సినిమాకు ముందు తర్వాత అనే రేంజ్లో తెలుగు సినిమా స్థాయి, మార్కెట్ పెరిగింది. అంతర్జాతీయంగా చైనా సహా పలు దేశాల్లో ఈ చిత్రం సూపర్ సక్సెస్ను సాధించింది. బాహుబలి వరకు ప్రభాస్ తెలుగు హీరో. బాహుబలి2కి ఇంటర్నేషల్ హీరో అయ్యారు. బాహుబలి 650 కోట్లకు పైగా కలెక్ట్ చేయడంతోపాటు పలు దేశాల్లో ఈ చిత్రం ప్రదర్శించడం ద్వారా ఇంటర్నేషనల్ హీరో అయ్యారు. బాహుబలి ప్రపంచ వ్యాప్తంగా ఎంతటి ప్రభంజనం సృష్టించిందో అందరికీ తెలిసిందే. ఇప్పుడు బాహుబలి2లో ప్రభాస్ను చూసేందుకు ప్రపంచమంతా ఎదురుచూస్తోందంటే యూనివర్సల్ హీరోగా ప్రభాస్ ఎంతటి ఖ్యాతిని సంపాదించుకున్నారో అర్థమవుతుంది. ఒకప్పుడు బాలీవుడ్లో తెలుగు సినిమా అంటే చిన్నచూపు చూసేవారు. కానీ ప్రభాస్ బాహుబలితో తెలుగు సినిమా రేంజ్ను తెలియచెప్పారు. బాలీవుడ్లో బాహుబలి హిందీ వెర్షన్ వందకోట్ల రూపాయలను వసూళ్లు చేయడం గొప్ప విషయం. ప్రభాస్ నటనకు బాలీవుడ్ ప్రేక్షకులు ఫిదా అయ్యారు. బాలీవుడ్కు చెందిన ప్రముఖ నిర్మాణ సంస్థలు ప్రభాస్ను హిందీలో నటించమని ఫ్యాన్సీ ఆఫర్స్ ప్రకటించడం అతనికి వున్న ఫాలోయింగ్ని తెలియజేస్తుంది. బాహుబలి సినిమా విడుదల వేరే భాషల్లో కూడా ప్రభాస్కు ఆదరణ పెరగడంతో తెలుగులో కమర్షియల్గా యావరేజ్ సక్సెస్ను సాధించిన సినిమాలు కూడా సోషల్ మీడియాల్లో, డబ్బింగ్ వెర్షన్స్లో సూపర్హిట్ చిత్రాలుగా ఎక్కువమంది వ్యూవర్స్ చూసిన చిత్రాలుగా నిలిచాయి.
బాహుబలిగా సెన్సేషనల్ రికార్డ్స్..
కొన్ని సినిమాలు.. కొన్ని కథలు ఎవరైనా ఈజీగా చేసేయొచ్చు కానీ ‘బాహుబలి’లాంటి సినిమా చెయ్యాలంటే ప్రభాస్ ఒక్కడే చెయ్యగలడని నిరూపించిన చిత్రం.. ‘బాహుబలి ది బిగినింగ్. బహుబలి చిత్రాన్ని ప్రభాస్ కోసమే రాజమౌళి స్పెషల్గా డిజైన్ చేశారు. ప్రభాస్ని దృష్టిలో పెట్టుకొని రాజమౌళి ‘బాహుబలి’ని ఓ అపురూప శిల్పంలా రూపొందించారు…రూపొందిస్తున్నారు.
దటీజ్ ప్రభాస్..
తెలుగు సినిమా అంటే ఏవో నాలుగు పాటలు, నాలుగు ఫైట్స్.. కొన్ని కామెడీ డైలాగులు పెడితే సరిపోతాయి కదా అనుకున్నవారందరూ సినిమా రిలీజ్ అయిన తర్వాత ఇది విజువల్ వండర్ అంటూ అప్రిషియేట్ చేశారు. ముఖ్యంగా హీరో ప్రభాస్ బాహుబలి పార్ట్ 1 కోసమే రెండేళ్లు కష్టపడ్డారు. ఈజీగా సినిమాలు చేసుకునే అవకాశాలున్నా ప్రభాస్ ఒక సినిమా కోసం రెండేళ్ళు ఇంకే సినిమా కమిట్ అవకుండా వర్క్ చెయ్యడం ఏమిటి? సినిమా కోసం తన శరీరాకృతిని మార్చుకోవడం ఏమిటి? సినిమా కోసం నిజంగా కత్తి యుద్దాలు నేర్చుకోవడం ఏమిటి? రెండేళ్ళలో ఈజీగా నాలుగు పక్కా కమర్షియల్ సినిమాలు చేసుకుంటే పేరుకు పేరు.. డబ్బుకు డబ్బు అన్నీ వస్తాయి కదా.. ఈ లెక్కలన్నీ పక్కన పెట్టి.. కథ చెప్తానని ఎవరు అడిగినా వినకుండా.. ఏ నిర్మాత ఎంత భారీ రెమ్యూనరేషన్ ఇస్తానని ఆఫర్ ఇచ్చినా.. ఒప్పుకోకుండా సున్నితంగా తిరస్కరిస్తూ.. అందరికీ ప్రభాస్ బాహుబలి కోసమే తన సమయాన్నంతా వెచ్చిస్తున్నారు. బాహుబలి రెండు పార్టుల కోసం ప్రభాస్ వెచ్చించిన సమయం నాలుగేళ్లు. ఇలా ఒక స్టార్ హీరో తన కెరీర్లో నాలుగేళ్ళ విలువైన సమయాన్ని ఓ సినిమాకే కేటాయించడం ప్రభాస్ డేడికేషన్కు నిదర్శనం. ఏ సినిమా చేసినా బాహుబలి తర్వాతే అంటూ ఎన్ని సినిమాలు చేసాం అన్నది కాదు.. ఎంత గొప్ప సినిమా చేస్తున్నాం అన్న పాయింట్ని దృష్టిలో పెట్టుకుని రాజమౌళి డ్రీమ్ ప్రాజెక్ట్ ‘బాహుబలి’ని తన నటనతో జీవం పోశాడు ప్రభాస్. 
అరుదైన గౌరవం..
భారతీయ చలన చిత్ర చరిత్రలో దేశీయంగా అత్యధిక వసూళ్ళు సాధించిన బాహుబలి చిత్రంలో నటించిన ప్రఖ్యాత భారతీయ నటుడు ప్రభాస్ మైనపు ప్రతిమను 2017లో బ్యాంకాక్లో మేడమ్ టుస్సాడ్స్ మ్యూజియంలో ప్రతిష్టిం చబోతున్నారు. ప్రపంచస్ధాయి కళాకారుల సరసన చోటు సంపాదించిన ఈ మైనపు ప్రతిమ మేడమ్ టుస్సాడ్ మ్యూజియంలో మార్చ్ 2017 నుండి ప్రత్యేకమైన ఆకర్షణగా నిలిచింది. ఏప్రిల్లో ప్రధానమంత్రి నరేంద్రమోదీ మైనపు విగ్రహ ప్రతిష్ట తర్వాత, ఈ గౌరవం దక్కించుకున్న మూడవ భారతీయునిగా ప్రభాస్ నిలిచాడు.
200 కోట్ల బడ్జెట్ హీరో….
బాహుబలితో యంగ్ రెబల్స్టార్ ప్రభాస్ రేంజ్ మారిపోయింది. బాహుబలి2 తర్వాత వస్తున్న ప్రభాస్ సినిమా… సాహో. దీని బడ్జెట్ రూ200 కోట్లకుపైనే. కేవలం యాక్షన్ దృశ్యాలకే రూ.90 కోట్లు ఖర్చు పెట్టార్ట. జిల్ ఫేమ్ రాధాకష్ణ కాంబోలో వస్తున్న సినిమాకీ కోట్లు కురిపిస్తున్నారు. ఇప్పుడు ప్రభాస్ ఒక భాష హీరో కాదు, మూడు భాషల హీరో అనిపించుకుంటున్నారు. ఇకపై ప్రభాస్ చేసే సినిమాలన్నీ తెలుగు, తమిళ్, హిందీ భాషల్లోనే నిర్మాణం జరుపుకోవచ్చు. ఇటు యూత్, ఫ్యామిలీ ఆడియెన్స్తో పాటు మాస్ ఆడియెన్స్లో కూడా ప్రభాస్ ఇమేజ్ అంతకంతకు పెరుగుతూనే ఉంది. ఇండస్ట్రీలో అందరితో ఫ్రెండ్లీగా వుంటూ అందర్నీ ఆప్యాయంగా ‘డార్లింగ్’ అని పలకరించే ప్రభాస్ని అందరూ ఎంతో ఇష్టపడతారు. అలాంటి యంగ్ రెబల్ స్టార్ ప్రభాస్ పుట్టినరోజు అక్టోబర్ 23. ఈ సందర్భంగా యంగ్ రెబల్ స్టార్ ప్రభాస్కు పుట్టినరోజు శుభాకాంక్షలు.
