నిన్న ప్రభాస్ పుట్టిన రోజు. అభిమానులంతా పండగలా చేసుకొన్నారు. ప్రభాస్ పాత సినిమాలు రీ రిలీజుల పేరిట థియేటర్లలోకి వచ్చాయి. దానికి తోడు ‘రాజాసాబ్’ మోషన్ పోస్టర్ సందడి మరింత పెంచింది. సోషల్ మీడియా అంతా ప్రభాసే నిండిపోయాడు. మరి ప్రభాస్ తన పుట్టిన రోజు, ఎలా జరుపుకొన్నాడు? ఎక్కడున్నాడు?
ప్రభాస్ ‘రాజాసాబ్’ షూటింగ్ హైదరాబాద్ లో జరుగుతోంది. అయితే పుట్టిన రోజున ప్రభాస్ సెట్కి వెళ్లలేదు. రోజంతా ఇంట్లో తన కుటుంబంతో హాయిగా గడిపాడు. రెగ్యులర్గా కలిసే సినిమావాళ్లు స్నేహితులకు సైతం ప్రభాస్ దూరంగా ఉన్నాడని, రోజుంతా కేవలం కుటుంబానికే కేటాయించాడని తెలుస్తోంది. ప్రభాస్కు అత్యంత సన్నిహితులకు రాత్రి పార్టీ ఇచ్చాడని సమాచారం.
ఒకట్రెండు రోజులు ప్రభాస్ పూర్తిగా పార్టీ మూడ్లోనే ఉంటాడని, ఆ తరవాతే షూటింగులకు హాజరవుతాడని తెలుస్తోంది. సోమవారం నుంచి ‘రాజాసాబ్’ షూటింగ్ లో ప్రభాస్ పాలు పంచుకోబోతున్నాడట. ప్రస్తుతం సంజయ్దత్ పై కొన్ని కీలకమైన సన్నివేశాలు తెరకెక్కిస్తున్నారు. మారుతి దర్శకత్వం వహిస్తున్న ఈ చిత్రాన్ని ఏప్రిల్ 10న ప్రపంచ వ్యాప్తంగా విడుదల చేస్తున్న సంగతి తెలిసిందే.
