బాలీవుడ్లో పాగా వేయాలని ఎవరికి ఉండదు? ముఖ్యంగా సౌత్ ఇండియాలో రాజ్యం ఏలుతున్న కథానాయికలకు ఆ ఆశలు ఇంకాస్త ఎక్కువ. ఆ అవకాశాలు కొంతమందికి వచ్చినట్టే వచ్చి చేజారిపోతుంటాయి. పూజా హెగ్డేకీ అంతే. తన ప్రయాణం బాలీవుడ్ తోనే మొదలైంది. అయితే.. క్రమంగా సౌత్కి వచ్చేసింది. ఇక్కడ వరుస విజయాలు రావడం, క్రేజ్ పెరగడంతో తెలుగునాట బిజీ అయిపోయింది. ఇప్పుడు టాలీవుడ్ లో మోస్ట్ వాంటెడ్ హీరోయిన్ తనే. అయితే బాలీవుడ్ కి వెళ్లాలని, అక్కడ ఓ మంచి సినిమాతో తనని తాను నిరూపించుకోవాలని అనుకుంది. హౌస్ఫుల్ 4లో ఆ అవకాశం వచ్చింది. కానీ ఆ సినిమా బాక్సాఫీసు దగ్గర బోల్తా కొట్టింది. ఆ ఫ్లాపుతో పూజాకి ఇక బాలీవుడ్ దారులు మూసుకుపోయినట్టే అనుకున్నారు.
అయితే ఇప్పుడు అనూహ్యంగా ఆ ఛాన్స్ వచ్చింది. రోహిత్ శెట్టి `సర్కస్`లో పూజాని కథానాయికగా ఎంచుకున్నారు. రణవీర్ సింగ్ కథానాయకుడు. రోహిత్ శెట్టి మాస్ పల్స్ తెలిసిన దర్శకుడు. తన సినిమా అంటే.. బాక్సాఫీసు దగ్గర మంచి క్రేజ్ ఏర్పడుతుంది. పైగా రణవీర్ సింగ్ యూత్ ఐకాన్. ఈ కాంబో పై మంచి అంచనాలే ఉంటాయి. ఇలాంటి ప్రాజెక్టులో ఛాన్స్ దొరకడంతో.. పూజా ఆనందానికి అవధుల్లేకుండా పోయింది. `ఈక్షణంలో ఎంత ఆనందంగా ఉన్నానో చెప్పలేను` అంటూ ట్వీట్ చేసింది పూజా. ఈ సినిమాతో పూజా కల నెరవేరినట్టే. కాకపోతే.. ఇలాంటి అవకాశాలు తనకు ఇది వరకూ వచ్చాయి. కానీ తన ఖాతాలో హిట్ పడలేదు. ఈ సినిమాతో ఆ లోటు తీరితే…. పూజా కల నెరవేరినట్టే.
