తాను సీఎం జగన్ కుటుంబానికి పెద్ద పాలేరునని మీడియా ముందు గర్వంగా ప్రకటించుకున్న పేర్ని నాని పై జగన్ పూర్తిగా విశ్వాసం కోల్పోయినట్లుగా కనిపిస్తోంది. మచిలీపట్నం ఎంపీ మీడియా ఎదుట ఆరోపణలు చేసి పార్టీ పరువు తీసినప్పటికీ.. ఆయనను కాకుండా పేర్ని నానినే పిలిచి సజ్జల హెచ్చరికలు జారీ చేసినట్లుగా వైసీపీ వర్గాలు చెబుతున్నాయి. పైగా ఆయన మచిలీపట్నం ఎంపీ బాలశౌరికి వ్యతిరేకంగా వెళ్తే.. పేర్ని నాని మంత్రిగా ఉన్న కాలంలో సంపాదించుకున్న అక్రమాస్తులన్నింటినీ బయట పెడతామని ఆ జాబితాను మీడియాకు లీక్ చేసినట్లుగా తెలుస్తోంది.
ఆదిలాబాద్ దగ్గర పేర్ని నాని వంద ఎకరాలు కొన్నారట.. ప్రకాశం జిల్లాలో బినామీల పేర్లతో గ్రానైట్ క్వారీ కూడా కొట్టేశారట.. ఇంకా పలు రకాల ఆర్థిక లావాదేవీలూ జరిగాయట. ఈ విషయాలన్నీ సజ్జల క్యాంప్ మీడియాకు లీక్ చేసింది. ఎక్కువ మాట్లాడితే ఈ సమాచారం అంతా తమ దగ్గర ఉందని.. పాలేరు అని కూడా చూడబోమని డైరక్ట్గా సంకేతాలు పంపినట్లుగా తెలుస్తోంది. ఈ విషయం తెలిసే పేర్ని నాని సైలెంట్ అవుతున్నారన్న అభిప్రాయం కూడా వినిపిస్తోంది.
అయితే అంత విధేయంగా ఉండే పేర్ని నాని ఒక్క సారిగా ఎందుకు జగన్ విశ్వాసం కోల్పోయారనేది ఎవరికీ అంతు చిక్కకుండా ఉంది. పవన్ పై ఒక్క సారిగా విరుచుకుపడి సొంత కులాన్ని కూడా కించ పర్చుకునే పేర్ని నాని .. ఏ విషయంలో ఇలా తడబడ్డారో ఆయన వర్గీయులకూ అంతుబట్టడం లేదు. బాలశౌరి జగన్ వ్యాపారాలకు బినామీ అన్న ప్రచారం ఉంది. ఈ కారణంగానే తమను దూరం పెడుతున్నారని.. బాలశౌరికే ప్రాధాన్యం ఇస్తున్నారని ఆయన వర్గీయులు అనుకుంటున్నారు. కారణం ఏదైనా పేర్ని నాని గడ్డు పరిస్థితిని ఎదుర్కొంటున్నారు.
