హైదరాబాద్: ఆ కాంబినేషన్ అత్యంత ప్రభావవంతమైన కాంబినేషన్. ‘జల్సా’, ‘అత్తారింటికి దారేది’ వంటి సూపర్ డూపర్ హిట్లను ఇచ్చిన కాంబినేషన్. అలాంటి కాంబో మళ్ళీ కలిస్తే సంచలనమే! అలాంటి సంచలనానికి శ్రీకారం చుడుతోంది… ‘శ్రీమంతుడు’ వంటి సూపర్ డూపర్ హిట్ చిత్రాన్ని అందించిన మైత్రీ మూవీస్ సంస్థ. ‘శ్రీమంతుడు’ తర్వాత, ఆ చిత్రానికి దర్శకత్వం వహించిన కొరటాల శివ దర్శకత్వంలోనే జూనియర్ ఎన్టీఆర్తో ‘జనతా గ్యారేజ్’ అనే సినిమాను రూపొందిస్తున్నారు. జూనియర్ ప్రస్తుతం సుకుమార్ దర్శకత్వంలో చేస్తున్న ‘నాన్నకు ప్రేమతో’ పూర్తవగానే ‘జనతా గ్యారేజ్’ ప్రారంభమవుతుంది. ప్రస్తుతం ఆ సినిమా ప్రీ ప్రొడక్షన్ దశలో ఉండగానే మూడో సినిమాకు రూపకల్పన చేస్తున్నారు. ఇది కనుక వాస్తవ రూపు దాల్చితే మైత్రీ మూవీస్ టాలీవుడ్లో అగ్రసంస్థగా మారిపోతుందనటంలో ఏమాత్రం సందేహంలేదు.
త్రివిక్రమ్ శ్రీనివాస్ ప్రస్తుతం నితిన్,సమంతలతో ‘అఆ ఇఈ’ అనే సినిమాను రూపొందిస్తుండగా, పవన్ బాబి దర్శకత్వంలో ‘సర్దార్ గబ్బర్ సింగ్’ చిత్రాన్ని చేస్తున్నారు. వీరిద్దరూ కలిసి ‘కోబలి’ అనే సినిమా నిర్మించాలని అనుకున్నప్పటికీ అది పట్టాలపైకి రావటంలేదు.
