జనసేన అధినేత పవన్ కల్యాణ్ వైసీపీ నేతలు తనపై అడ్డూ అదుపు లేకుండా చేస్తున్న విమర్శలకు కౌంటర్ ఇచ్చారు. జనసేనను టీడీపీ బీ అంటే… ఇక నుంచి తాము వైసీపీని చర్లపల్లి షటిల్ టీం అని పిలుస్తామని హెచ్చరించారు. అనంతపురం జిల్లా లో ఆత్మహత్య చేసుకున్న కౌలు రైతుల కుటుంబాలను పరామర్శిస్తున్న ఆయన మధ్యలో మీడియాతో మాట్లాడారు. ఈ సందర్భంగా వైసీపీ నేతలు చేస్తున్న విమర్శలపై స్పందించారు. చంద్రబాబు దత్తపుత్రుడు అని కొంత మంది చేస్తున్న విమర్శలకు.. ఇక కౌంటర్‌గా సీబీఐ దత్తపుత్రుడు జగన్ అని అనాల్సి ఉంటుందన్నారు.

పవన్ కల్యాణ్ చాలా కాలంగా ప్రభుత్వంపై విధానపరంగా పోరాడుతున్నారు. కానీ పవన్ పై వైసీపీ నేతలు వ్యక్తిగత విమర్శలకు దిగుతున్నారు. చివరికి ముఖ్యమంత్రి జగన్ కూడా పవన్ ను వ్యక్తిగతంగా దూషిస్తున్నారు. జగన్ దెయ్యం.. రాక్షసుడు అనడం ప్రారంభించారు. అలాంటి మాటలు తమకు రాక కాదని.. ఇంత కాలం జనసేన అధినేత పెద్దగా స్పందించలేదు. కానీ ఇప్పుడు మాత్రం ఇక ఊరుకునేది లేదని రివర్స్ కౌంటర్ ఇవ్వాలని నిర్ణయించుకున్నట్లుగా కనిపిస్తోంది.

పవన్ కల్యాణ్ వ్యక్తిగత విమర్శలకు వ్యక్తిగతంగానే కౌంటర్ ఇవ్వాలని జనసైనికులు కూడా కోరుకుంటున్నారు. అలా ఇస్తేనే డోస్ కరెక్ట్ గా ఉంటుందని లేకపోతే మాటలు మీరిపోతున్నారని భావిస్తున్నారు. ఈ కౌంటర్‌లను ఇలా కొనసాగించాలని కోరుకుంటున్నారు.