ఎన్నికల ప్రచారంలో భాగంగా తణుకు బహిరంగ సభలో మాట్లాడిన పవన్ కళ్యాణ్- ఇటు జగన్ మీద, అటు చంద్రబాబు మీద తీవ్ర ఆరోపణల తో విరుచుకుపడ్డారు. కెసిఆర్ బిస్కెట్ల కోసం జగన్ ఆంధ్రుల ఆత్మగౌరవాన్ని తాకట్టు పెడుతున్నారు అని వ్యాఖ్యానించిన పవన్ కళ్యాణ్, తెలుగుదేశం పార్టీ సైకిల్ చైన్ ఎప్పుడో తెగిపోయిందని, చైన్ తెగిపోయినా కూడా స్టాండ్ వేసి సైకిల్ తొక్కుకుంటూ తెలుగుదేశం పార్టీ వాళ్లు కాలం వెళ్లదీస్తున్నారని పవన్ కళ్యాణ్ వ్యాఖ్యానించారు.

2018 మార్చి 14న జనసేన ఆవిర్భావ సభలో సైకిల్ చైన్ తాము తెంపి వేశామని పవన్ కళ్యాణ్ గుర్తు చేశారు. తెలుగుదేశం పార్టీ నాయకులు అడ్డగోలుగా అవినీతి చేయడం వల్లే వాళ్ల సైకిల్ చైన్ తెంపి వేయాల్సి వచ్చిందని పవన్ కళ్యాణ్ అన్నారు‌. అయితే సైకిల్ చైన్ తెగిపోయినా కూడా, తెలుగుదేశం పార్టీ వాళ్లు ఇప్పటికీ తమ పరిస్థితి బాగానే ఉందని అనుకుంటూ భ్రమలో ఉన్నారని పవన్ కళ్యాణ్ వ్యాఖ్యానించారు. తెలుగుదేశం పార్టీ కానీ , వైఎస్ఆర్ సీపీ కానీ ఎట్టి పరిస్థితుల్లో ప్రభుత్వాన్ని ఏర్పాటు చేయలేవని పవన్ కళ్యాణ్ జన సైనికులకు కేరింతల మధ్య వ్యాఖ్యానించారు. ఇటు తెలుగుదేశం పార్టీ అటు వైఎస్సార్ సీపీ ఇద్దరూ కూడా మూడో పార్టీ వచ్చినప్పుడు దాన్ని తొక్కి వేయడానికి విపరీతంగా ప్రయత్నిస్తున్నారని అన్న పవన్ కళ్యాణ్, అప్పట్లో చిరంజీవి ప్రజారాజ్యం పార్టీ పెట్టినప్పుడు కూడా ఇలాగే దుష్ప్రచారం చేశారని, ఇప్పుడు జనసేన తొక్కి వేయడానికి అన్ని రకాలుగా ప్రచారం చేస్తున్నారని వ్యాఖ్యానించారు.

రష్యాలో జార్ చక్రవర్తులు కూడా , విప్లవం కారణంగా తమ రాజ్యాలు పతనమయ్యే స్థితికి వచ్చినప్పటికీ దాన్ని గుర్తించకుండా కోట లో కూర్చుని అంతా బాగుందని అనుకునేవారని, ఇప్పుడు తెలుగుదేశం పార్టీ , వైఎస్ఆర్ సీపీ కూడా వారి వారి కోటల లో కూర్చుని అలాగే భావిస్తున్నాయని పవన్ కళ్యాణ్ వ్యాఖ్యానించారు. ఏది ఏమైనా జనసేన పార్టీ లేకుండా తెలుగుదేశం కానీ వైఎస్సార్సీపీ కానీ ప్రభుత్వాన్ని ఏర్పాటు చేసే పరిస్థితి లేదని పవన్ కళ్యాణ్ మరోసారి ఉద్ఘాటించారు.