ప‌రుచూరి బ్ర‌ద‌ర్స్ డైలాగుల్ని నంద‌మూరి బాల‌కృష్ణ ప‌లికితే… అభిమానుల‌కు అదో పుల‌కింత‌. బాల‌య్య సూప‌ర్ డూప‌ర్ హిట్ సినిమాల్లో ప‌రుచూరి సోద‌రుల వాటా ఎక్కువ‌గానే ఉంది. బోయ‌పాటి, క్రిష్‌లాంటి న‌వ‌త‌రం ద‌ర్శ‌కుల‌తో బాల‌య్య జ‌త క‌ట్టాక‌… ప‌రుచూరి సోద‌రుల డైలాగులు బాల‌య్య నోటి నుంచి విన‌డం క‌ష్ట‌మైపోయింది. ఇప్పుడు మ‌రోసారి బాల‌య్య కోసం ఓ క‌థ వండుతున్నారు ప‌రుచూరి బ్ర‌ద‌ర్స్‌.

నంద‌మూరి బాల‌కృష్ణ – వినాయ‌క్ కాంబినేష‌న్‌లో ఓ సినిమా రాబోతోంది. నిజానికి `ఎన్టీఆర్‌` బ‌యోపిక్‌కి ముందే ఈ ప్రాజెక్టు ప‌ట్టాలెక్కాలి. కానీ కుద‌ర్లేదు. కె.ఎస్‌.ర‌వికుమార్ చెప్పిన క‌థ ఓకే అవ్వ‌క‌పోతే… వినాయ‌క్ సినిమానే ప‌ట్టాలెక్కేది. కానీ ర‌వికుమార్ పూర్తి స్క్రిప్టుతో రెడీ అయిపోవ‌డంతో… అర్జెంటుగా ఈ సినిమాని ప‌ట్టాలెక్కించేశాడు బాల‌య్య‌. అయితే వినాయ‌క్ మాత్రం త‌న ప్ర‌య‌త్నాలు మానలేదు. ప‌రుచూరి బ్ర‌దర్స్‌తో ఓ క‌థ సిద్ధం చేయిస్తున్నాడ‌ట‌. ఇప్ప‌టికే స‌గం క‌థ త‌యారైపోయింద‌ని, మిగిలిన స‌గం ఓకే అయిపోతే… ఈ క‌థ‌ని బాల‌య్య‌కు వినిపిస్తార‌ని తెలుస్తోంది. ప‌రుచూరి సోద‌రులంటే బాల‌య్య‌కు ప్ర‌త్యేక‌మైన అభిమానం. బాల‌య్య క్రేజ్‌, ఫాలోయింగ్‌కి త‌గిన క‌థ‌ని సిద్ధం చేయ‌డంలో ప‌రుచూరివాళ్లు కూడా సిద్ధ‌హ‌స్తులు. కాబ‌ట్టి.. ఈ క‌థ ఓకే అయిపోయే ఛాన్సులే ఎక్కువ‌గా ఉన్నాయి. మ‌రి ఏం జ‌రుగుతుందో చూడాలి.