తెలుగుదేశం పార్టీకి చెందిన మరో ఇరువురు ఎమ్మెల్యేలు గుడ్ బై చెప్పడం దాదాపు ఖాయమైపోయింది. పర్చూరు ఎమ్మెల్యే సాంబశివరావు, రేపల్లె ఎమ్మెల్యే అనగాని సత్యప్రసాద్ వైసీపీలో చేరాలని నిర్ణయించుకున్నట్లుగా తెలుస్తోంది. ఏ క్షణమైనా సీఎంను కలిసే అవకాశం ఉంది. అధికారంగా పార్టీలో చేరరు. వైసీపీ అధినేత రాజీనామా చేయించిన తర్వాతే చేర్చుకోవాలనే ఓ నియమం పెట్టుకున్నారు. గతంలోనూ వీరిపై పార్టీ మార్పు కథనాలు వచ్చినా… ఇప్పుడు చర్చలు కొలిక్కి వచ్చినట్లుగా తెలుస్తోంది. తెలుగుదేశం పార్టీ మహానాడు జరుపుకుంటోంది. ఈ సందర్భంగా ఆ పార్టీకి షాక్ ఇవ్వాలని కొద్ది రోజుల నుంచి వైసీపీ అగ్రనేతలు ప్లాన్లో ఉన్నారు. చివరికి చర్చలు జరిపి… ఓకే చేశారు.
ఇప్పటికే గన్నవరం ఎమ్మెల్యే వల్లభనేని వంశీమోహన్, గుంటూరు తూర్పు నియోజకవర్గం ఎమ్మెల్యే మద్దాల గిరిధర్, ప్రకాశం జిల్లా చీరాల ఎమ్మెల్యే కరణం బలరామ్ లు వైసీపీకి మద్ధతు పలికారు. ఇప్పుడు మరో ఇద్దరు పార్టీని వీడుతూండటంతో.. గెలిచిన ఇరవై మూడు మందిలో ఐదుగురు గుడ్ బై చెప్పినట్లు అవుతుంది. ఈ ఇద్దరు ఎమ్మెల్యేలతో నేరుగా విజయసాయిరెడ్డి చర్చలు జరిపారు. హైదరాబాద్లో ఈ చర్చలు జరిగినట్లుగా తెలుస్తోంది. తమపై తీవ్ర ఒత్తిడి ఉందని.. బుజ్జగించాలని ప్రయత్నించిన టీడీపీ నేతలకు వారు తేల్చి చెప్పినట్లుగా ప్రచారం జరుగుతోంది. పర్చూరు ఎమ్మెల్యేకు కొన్ని వ్యాపారాలు ఉన్నాయి. ఆయన కంపెనీల ఉత్పత్తుల్ని ఏపీలో అమ్మడం ఆపేశారు. దీంతో ఆయన ఆర్థిక చిక్కుల్లో పడ్డారు.
ఎన్నికల సమయంలోనే రేపల్లె ఎమ్మెల్యేకు హైదరాబాద్ ఆస్తుల విషయంలో బెదిరింపులు వచ్చాయని ప్రచారం జరిగింది. నిజమేనని.. ఆస్తులు పోయినా.. తాను టీడీపీ తరపున బరిలో ఉంటానని అప్పట్లో సత్యప్రసాద్ ప్రకటించారు. తనకు బాగా అప్పులయ్యాయని ఆ ఎమ్మెల్యే తన అనుచరుల వద్ద పార్టీ మార్పు కారణాలను చెబుతున్నట్లుగా తెలుస్తోంది. పార్టీ వీడి వెళ్లేవారిని బతిమిలాడొద్దని అధినేత చంద్రబాబు నిర్ణయించుకున్నట్లుగా చెబుతున్నారు.
