పనామాలోని మోసాక్ ఫొనెస్కా పేపర్లు లీకయ్యాయి. యావత్తు ప్రపంచం మాదిరిగానే భారత్లో కూడా నల్లకుబేరుల పేర్లు కొన్ని బయటకు రావడంతో ప్రకపనంలు పుడుతున్నాయి. వివరాలు పూర్తిస్థాయిలో వెలుగులోకి వస్తే గనుక.. ఇంకా ఎన్ని దారుణాలు జరుగుతాయో… ఎందరు కొమ్ములు తిరిగిన ప్రముఖుల చీకటిసొమ్ముల బాగోతాలు బయటపడతాయో అందరూ నిరీక్షిస్తున్నారు. ప్రస్తుతానికి ఈ ‘పనామా పేపర్స్’ నల్లడబ్బు కుంభకోణంలో బయటకు వచ్చిన భారతీయుల పేర్లలో దేశానికంతా సుపరిచితులైన, దేశానికి గర్వకారణాలు కూడా అయిన సెలబ్రిటీలు అమితాబ్ బచ్చన్, ఐశ్వర్యారాయ్ తదితరులు ఉన్నారు. ఇంకా అనేక మంది వ్యాపార వేత్తలు డీఎల్ఎఫ్ గ్రూపునకు చెందిన కెపి సింగ్, ఇండియా బుల్స్ గ్రూపునకు చెందిన సమీర్ గెహ్లాట్, అదానీ గ్రూపునకు చెందిన వినోద్ అదానీ తదితరుల పేర్లు ఇప్పటికే వెలుగులోకి వస్తున్నాయి. ‘పనామా పేపర్స్’ కుంభకోణంగా ప్రపంచంలోనే అతిపెద్ద కుంభకోణంగా యావత్ జగతి గుర్తిస్తున్న ఈ వ్యవహారంలో సుమారు 500 మందికి పైగా భారతీయ ప్రముఖులకు ప్రమేయం ఉండచ్చునని అంచనా వేస్తున్నారు.
సిగ్గు పడాల్సిన విషయం ఏంటంటే.. మన దేశంలోని కొందరు బడాబాబులు వక్రమార్గాల్లో విదేశాలలో దాచుకుంటున్న లక్షల కోట్ల రూపాయల దొంగసొమ్మును స్వదేశానికి తీసుకువస్తాం అనే నినాదంతో భారతీయ జనతా పార్టీ గద్దె ఎక్కింది. రెండేళ్ల పాలనలో ఆదిశగా వారు చేపట్టిన చర్యలు శూన్యం అనే చెప్పాలి. మీరు విదేశాల్లో దాచుకున్న సొమ్మును మీరే వివరాలు చెప్పండి.. మీకు పన్ను మినహాయింపులు ఇస్తాం.. తరహా మెరమెచ్చు డైలాగులతో.. నల్లడబ్బు కుబేరుల కాళ్లు పట్టుకుని బతిమాలుతున్నట్లుగా మోడీ సర్కారు వ్యవహరిస్తున్నదే తప్ప… దృఢవైఖరితో ఉన్నట్లుగా ఇప్పటిదాకా తమ చిత్తశుద్ధిని నిరూపించుకోలేదు.
ఇంతలో ఈ తాజాగా పనామా పేపర్స్ వ్యవహారం మరో దెబ్బ! ఇప్పుడు వెల్లడవుతున్న వాస్తవాలు దేశంలో జనాన్ని నిర్ఘాంత పరుస్తున్నాయి. పరిస్థితులు అన్నీ అనుకూలిస్తే.. వస్తున్న కొన్ని పుకార్లు నిజమే అయితే గనుక.. అమితాబ్ బచ్చన్.. వచ్చే విడత ఎన్నికల్లో ఈ దేశానికి రాష్ట్రపతి అయిపోబోతోన్న వ్యక్తి. మోడీ ఓటు కూడా ఆయన వైపే ఉన్నట్లు పుకార్లున్నాయి. అలాంటి అమితాబ్ ఈ దేశానికి పన్నులు ఎగ్గొట్టి.. నల్లడబ్బును విదేశాల్లో దాచుకుంటున్న నిందితుల్లో మొదటి సెలబ్రిటీ! ఆయన కోడలు అందాల కీర్తిపతాకను ప్రపంచ యవనికపై ఎగురవేసిన ఐశ్వర్యారాయ్ మరో నిందితురాలు. మోడీకి సన్నిహితులుగా గుర్తింపు ఉన్న వ్యాపార దిగ్గజాలు అదానీ గ్రూపు … ఇలా అనేక మంది కొమ్ములు తిరిగిన ప్రముఖులు ఉన్నారు. మరి ప్రభుత్వం ఏం చేస్తుంది. వీరి గడ్డాలూ కాళ్లూ పట్టుకుని ”బాబ్బాబూ.. మీ సొమ్ములు వెనక్కు తెచ్చేసుకోండి.. పన్ను మినహాయింపులు ఇస్తాం” అంటూ బతిమాలుతుందా? రాష్ట్రాల అవసరాలు అంటే చులకనగా చూసే దుర్మార్గపు అలవాటున్న మేధావి అరుణ్జైట్లీ జాతికి సమాధానం చెప్పాల్సిన అవసరం ఉంది.
