ఎక్కడో పరాయిగడ్డ మీద భారత్తో జరిగిన టీ20 మ్యాచ్ ఓడిపోయినందుకే.. స్వదేశంలో క్రీడాభిమానుల్లోని అతివాదులకు ఎలా సంజాయిషీ చెప్పుకోవాలో.. వారి దాడులనుంచి ఎలా తప్పించుకోవాలో తెలియని స్థితిలో పాకిస్తాన్ కొట్టు మిట్టాడుతున్నది. బంగ్లాదేశ్ చేతిలో కూడా ఓటమి చవిచూసిన ఆ పాకిస్తాన్ జట్టు.. మరోసారి మ్యాచ్ జరిగినా సరే.. ఇప్పుడు అత్యద్భుతమైన ఫాంలో ఉన్న భారత జట్టును ఓడించే పరిస్థితి లేదన్నది స్పష్టం. ఇలాంటి నేపథ్యంలో.. భద్రతకు సంబంధించి భారత్ సరైన హామీలు ఇవ్వలేదంటూ.. ప్రపంచకప్లో భాగంగా భారత్లో పాకిస్తాన్ ఆడవలసి ఉన్న మ్యాచ్ను రద్దు చేసుకోవడానికి ఆదేశం క్రికెట్ బోర్డు నిర్ణయించడం వివాదాస్పదంగా మారుతున్నది. ఆడలేక మద్దెల ఓడన్న చందంగా.. భారత్తో ఎట్టి పరిస్థితుల్లోనూ గెలవలేం అనే భయంతోనే.. పాకిస్తాన్ ఇలా భద్రత ముసుగులో నాటకాలు ఆడుతున్నదనే ఆరోపణలు వినిపిస్తున్నాయి.
టీ20 ప్రపంచకప్లో భాగంగా.. భారత్- పాకిస్తాన్ల మధ్య హిమాచల ప్రదేశ్లోని ధర్మశాలలో ఒక మ్యాచ్ జరగాల్సి ఉంది. అయితే ధర్మశాలలో భద్రత ఏర్పాట్లు ఎలా ఉంటాయో.. తమ జట్టుకు ఎలాంటి రక్షణ ఉంటుందో ఏమో అంటూ పాకిస్తాన్ క్రికెట్ బోర్డు అతి భయాన్ని ప్రదర్శించింది. ఆమేరకు ఇక్కడి భద్రత ఏర్పాట్లను సమీక్షించడానికి ఇద్దరు పాక్ అధికార్లను కూడా పంపింది. వారు వచ్చి ధర్మశాల క్రికెట్ స్టేడియంను కూడా సందర్శించి.. అక్కడి పోలీసు అధికారులతో కూడా సమావేశం నిర్వహించి.. తొలుత సంతృప్తి చెందినట్లు కనిపించినా.. తర్వాత.. నో అన్నారు.
పాక్ అభ్యంతరాల నేపథ్యంలో మ్యాచ్ వేదికను ధర్మశాలనుంచి కోల్కతకు మార్చడానికి బీసీసీఐ ఒప్పుకుంది. కోల్కత్ ఈడెన్ గార్డెన్స్ వేదికగా ఉంటే ఆడుతాం అని పాక్ అధికారులే కోరారని, ఆ మేరకు కోల్కతను సిద్ధం చేయడానికి ఓకే అని ప్రకటించింది. అంతలో ఏమైందో గానీ.. భారత్ భద్రతకు సంబంధించి హామీ ఇవ్వలేదని, ఈ నేపథ్యంలో పాక్ జట్టు ఇక్కడ పర్యటించడం వాయిదా పడినట్లేనని వార్తలు వస్తున్నాయి. పాక్ అధికారులు కోరినట్లుగా వేదిక మార్చినా, భద్రత గురించి పూర్తి హామీ ఇచ్చినా.. ఇలా మాట మార్చడం గురించి బీసీసీఐ ఆగ్రహంగా ఉన్నట్లుసమాచారం.
ఏది ఏమైనప్పటికీ.. భారత్తో టీ20 క్రికెట్ మ్యాచ్ ఆడాలంటేనే పాకిస్తాన్ భయపడిపోతున్నదని దీన్ని బట్టి అర్థమవుతోంది. నిజానికి వారు బంగ్లాదేశ్ చేతిలో ఓడిపోయినా.. ఆ దేశంలో మనగలరేమో గానీ.. భారత్ చేతిలో ఓడిపోతే.. తీవ్రమైన ప్రజా ప్రతిఘటనను ఎదుర్కోవాల్సి ఉంటుంది. అందుకే పరాజయ భయంతో వారు మ్యాచ్కు రాకుండా ఈ నాటకాలు ఆడుతున్నారని అంతా అనుకుంటున్నారు.
