టీవీ చానళ్లలో “సర్వం ప్రాప్తి రస్తు” అంటూ ప్రవచనాలు బోధించే శివోహం రామ శివానుజమ్ అలియాస్ రామ శివ చైతన్యస్వామి అసలు వేషంలో చెంబులు, చెంబులో నగలు దొంగిలిస్తూంటారు. హైదరాబాద్లో తత్వపీఠం పేరుతో ఆశ్రమాన్ని నెలకొల్పి.. దొంగతనాలకు కొత్త పద్దతి కనిపెట్టాడు. వివిధ టీవీ ఛానళ్లలో “సర్వం ప్రాప్తి రస్తు” పేరుతో పెయిడ్ ప్రోగ్రామ్లు చేసేవాడు. కొద్ది కొద్దిగా పాపులారిటీని పెంచుకుని.. తర్వాత ఎన్టీఆర్ స్టేడియం, విజయవాడ, గుంటూరుల్లో హరిహర శక్తి యాగం పేరుతో హోమాలు, యాగాలను నిర్వహించాడు. ఇలాంటి సందర్భాల్లో వివిధ సమస్యలతో తన దగ్గరకు వచ్చే వారిని.. మెల్లగా ట్రాప్ చేశారు.
ఆరోగ్య సమస్యలు, సంసారంలో ఇబ్బందులు వున్న వారు నేరుగా బాబా తన ఆశ్రమానికి పిలిపించుకొని వారికున్న సమస్యలకు పరిష్కారం యాగం చేయడం ద్వారా వస్తుందని నమ్మబలికేవాడు. తనే స్వయంగా తర్వాత వారింటికి వెళ్లి యాగం చేసేవాడు. రెండు కలశాలు తెప్పించి.. ఓ దాంట్లో ఇంట్లో ఉన్న ఆభరణాలనువేయించి మూటగట్టేవాడు. రెండో దాంట్లో.. బియ్యం, రాళ్లు ఉంచేవాడు. యాగం సందర్భంగా…తాను చెప్పిన మంత్రాన్ని జపిస్తూ… ఉండాలని చెప్పేవాడు. రెండు నెలల తర్వాత వచ్చి తానే కలశాన్నితెరుస్తానిని.. అప్పుడు బంగారం రెట్టింపు అవుతుందని ఆశ పెట్టేవాడు. వెళ్లేటప్పుడు.. బియ్యం, రాళ్లు పెట్టిన కలశాన్ని తీసుకెళ్లేవారు. కానీ అసలు బంగారం పెట్టిన కలశాన్ని తీసుకెళ్తాడు. రాళ్లు, బియ్యం ఉన్న కలశాన్ని యాగం చేయించుకున్న వారికి ఇస్తాడు. తర్వాత ఆ బంగారాన్ని ముత్తూట్, మణప్పురంలలో తాకట్టు పెట్టి జల్సాలు చేసేవాడు.
ఇలా యాగం చేయించుకున్న వారి బాబా ఎప్పుడు కలశం ఓపెన్ చేస్తారా.. రెట్టింపైన బంగారం తీసుకుందామా అని ఎదురు చూస్తూనే ఉన్నారు. కానీ బాబా రాలేదు. చివరికి వారే కలశాలను తెరిచి చూసి.. షాక్కు గురయ్యారు. బియ్యం, రాళ్ల కలశం తమకు ఇచ్చి.. బంగారం ఉన్న కలశం పట్టుకుపోయాడని గుర్తించి పోలీసుల్ని ఆశ్రయించారు. తత్వపీఠం బాబా ఆట కట్టించిన పోలీసులు రెండు కిలోల బంగారం, కారు స్వాధీనం చేసుకున్నారు. ఎంతటి విద్యావంతులైనా.. డబ్బులు, బంగారం రెట్టింపు చేస్తామనే బాబాలను… బురిడీగాళ్లను ఎలా నమ్ముతున్నారోనని పోలీసులు కూడా ఆశ్చర్యపోవాల్సి వస్తోంది.
