గురు సినిమాతో ఆకట్టుకుంది సుధా కొంగర. ఆ సినిమా కమర్షియల్ గా పెద్ద హిట్ కాదు. పైగా రీమేక్. అందుకే సుధాకొంగరని తెలుగు ప్రేక్షకులు పెద్దగా పట్టించుకోలేదు. హీరోలూ లైట్ తీసుకున్నారు. కానీ… సుధా కొంగర లోని ప్రతిభ గుర్తించిన సూర్య ఆమెకు అవకాశం ఇచ్చాడు. నిర్మాతగానూ తానే నిలబడి ప్రోత్సహించాడు. ఫలితమే… `ఆకాశం నీ హద్దురా`.
ఈ సినిమా ప్రేక్షకులకు ఓ కొత్త అనుభూతి పంచింది. ఓటీటీలో ఇప్పటి వరకూ వచ్చిన సినిమాల్లో ఇదే బెస్ట్ అంటూ కితాబులు అందిస్తున్నారు. మెల్లగా సెలబ్రెటీలకూ ఈ సినిమా కిక్ ఇవ్వడం మొదలెట్టింది. ఈ సినిమా చూసిన విజయ్ దేవరకొండ `ఫెంటాస్టిక్` అంటూ తెగ పొగిడేశాడు. సుధా కొంగరతో పనిచేయాలని ఉందంటూ.. ట్వీట్ చేశాడు. ఇప్పుడు మహేష్ బాబు వంతు వచ్చింది. ఈసినిమా మహేష్కీ నచ్చింది. దాంతో.. సూర్య నటన గురించీ, సుధా కొంగర దర్శకత్వ ప్రతిభ గురించీ ట్వీట్ చేశాడు. అవకాశం ఇస్తా.. అనే మాట అనలేదు గానీ, సుధా కొంగర వర్క్ మహేష్కి నచ్చిందన్న విషయం అర్థమవుతూనే ఉంది. ఎప్పటి నుంచో మహేష్కి లేడీ డైరెక్టర్తో పనిచేయాలని ఆశ. ఆ విషయాన్ని కొన్నిసార్లు చెప్పాడు కూడా. ఇప్పుడు తనకు మంచి ఆప్షన్ దొరికినట్టైంది. `గురు` కోసం సుధా కొంగరతో పనిచేసిన వెంకటేష్.. మరోసారి తనతో సినిమా చేయడానికి ఉత్సాహం చూపిస్తున్నట్టు టాక్. అంతేకాదు.. రానా కూడా.. `ఏమైనా కథ ఉంటే చూడు` అంటూ కబురు పంపాడట. ఇవన్నీ ఎప్పుడు వర్కవుట్ అవుతాయి.. అసలు చేస్తారా? లేదా అని పక్కన పెడితే… టాలీవుడ్ హీరోలకు సుధా కొంగర రూపంలో ఓ మంచి ఆప్షన్ కనిపిస్తోంది.
