సోష‌ల్ మీడియా య‌మ ఫాస్టుగా ఉంది. చిన్న హింటు దొరికితే చాలు. క‌థ‌లు అల్లేస్తున్నారు. సినిమాల టైటిళ్లూ పుట్టించేస్తున్నారు. సినిమా మొద‌ల‌వ్వ‌క‌ముందే.. ఆ సినిమా క‌థ‌ల గురించి బోలెడ‌న్ని క‌థ‌లు రాసేస్తున్నారు. అఫీషియ‌ల్ ప్ర‌క‌ట‌న రాక ముందే – ఈ క‌థ‌నాల జోరు మొద‌లైపోతోంది. తాజాగా ఎన్టీఆర్‌సినిమా కూడా ఇలానే వార్త‌ల్లో నిలుస్తోంది.

ఎన్టీఆర్ – ప్ర‌శాంత్ నీల్ కాంబినేష‌న్లో ఓ సినిమా రాబోతోంద‌ని ఫిల్మ్ న‌గ‌ర్ టాక్‌. ప్ర‌శాంత్ నీల్ కి ఇది వ‌ర‌కే మైత్రీ మూవీస్ సంస్థ అడ్వాన్స్ ఇచ్చింది. ఆ మేర‌కు మైత్రీలో ప్ర‌శాంత్ నీల్ ఓ సినిమా చేస్తాడ‌ని, అందులో ఎన్టీఆర్ క‌థానాయ‌కుడిగా క‌నిపిస్తాడ‌ని టాక్‌. ఈ కాంబో దాదాపు ఖాయ‌మే. కానీ.. కొంత కాలం ఓపిక ప‌ట్టాలి. ఈలోగా.. ఈ సినిమాకి సంబంధించిన టైటిళ్లు వ‌రుస క‌డుతున్నాయి. `రేడియేష‌న్` అనే టైటిల్ ముందుగా బ‌య‌ట‌కు వ‌చ్చింది. ఇప్పుడు `మెస్సైల్‌`, `న్యూక్లియ‌ర్‌` టైటిళ్లూ వినిపిస్తున్నాయి. ఇదో సైన్స్‌ఫిక్ష‌న్ సినిమా అని గుస‌గుస‌లు మొద‌ల‌య్యాయి. అందుకే ఈ త‌ర‌హా టైటిళ్లు పుట్టించేస్తున్నారు. ద‌ర్శ‌క నిర్మాత‌లు మాత్రం ఈ టైటిళ్లు వింటూ.. టైమ్ పాస్ చేస్తున్నారు. సినిమా మొద‌ల‌య్యేలోగా ఇంకెన్ని వార్త‌లు, టైటిళ్లూ బ‌య‌ట‌కు వ‌స్తాయో..?