మహేష్ ఫ్యాన్స్ మరోసారి నిరాశలో కూరుకుపోయారు. ఉగాదికైనా మహేష్ ఫస్ట్ లుక్ చూద్దామన్న వాళ్లు మరోసారి నీరుగారిపోయారు. మురుగదాస్ – మహేష్ బాబు కాంబినేషన్లో ఓ చిత్రం తెరకెక్కుతున్న సంగతి తెలిసిందే. జూన్లో ఈ సినిమా ప్రేక్షకుల ముందుకు వస్తుంది. ఈ సినిమా మొదలై చాలా కాలమైంది.. దాదాపు పూర్తి కావొచ్చింది. అయినా సరే.. ఇప్పటి వరకూ ఫస్ట్ లుక్ బయటకు రాలేదు. కనీసం టైటిల్ ఏంటో కూడా చెప్పడంలేదు. మహేష్ సినిమా మొదలైన తరవాత చాలా పండుగలు వచ్చి వెళ్లిపోయాయి. మహేష్ పుట్టిన రోజుకి ఫస్ట్ లుక్ చూపిస్తారనుకొన్నారంతా. ఆ తరవాత జనవరి 1 వచ్చింది, సంక్రాంతి వచ్చింది, రిపబ్లిక్ డే వచ్చింది.. ఇప్పుడు ఉగాది కూడా వచ్చి వెళ్లిపోతోంది.. కానీ.. మహేష్ గిఫ్టులేం ఇవ్వలేదు.
అగ్ర కథానాయకుడి సినిమా అంటే.. పండక్కో, పుట్టిన రోజుకో ఓ స్టిల్లో, టీజరో విడుదల చేయడం రివాజు. అప్పుడే ఫ్యాన్స్కి నిజమైన పండగ. ఇలాంటి సందర్భం కోసం అభిమానులు ఎప్పటి నుంచో ఆశగా ఎదురుచూస్తున్నారు. ఇదిగో.. అదిగో అంటున్నారు తప్ప.. ఫస్ట్ లుక్ మాటెత్తడం లేదు. చాలా టైటిళ్లు వినిపిస్తున్నా అందులో ఖాయమైనదేదో చెప్పడం లేదు. ఫస్ట్ లుక్ కోసం ఇన్నాళ్లు వెయిట్ చేయించిన సినిమా ఇదొక్కటేనేమో. ఏదేమైనా నెలల తరబడి అభిమానుల్ని నిరీక్షణలో పెట్టేయడం మాత్రం టూమచ్. ఇప్పటికైనా వదులుతారా… లేదంటే ఇలానే జాప్యం చేస్తారా? ఇలా ఊరించి ఊరించి ఓ ఫస్ట్ లుక్ విడుదల చేస్తే అది బ్రహ్మాండం బద్దలయ్యేలా ఉండాలి. సింపుల్గా లాగించేస్తే మాత్రం ఈ సినిమాపై నెగిటీవ్ ఇంప్రెషన్స్ బయటకు వచ్చే ప్రమాదం ఉంది.
