దేశం అంతా ఇప్పుడు ఎన్కేఆర్ అంటే నితీష్ కుమార్ రెడ్డి గురించే చర్చించుకుంటున్నారు. బాక్సింగ్ డే టెస్టులో ఆస్ట్రేలియాను బాక్సింగ్ ఆడేసిన వైనం చూసి వావ్.. అని పొగిడిస్తున్నారు. ఎనిమిదో స్థానంలో బ్యాటింగ్ కు దిగి చేసిన విన్యాసాలు చూసి మాస్టర్ బ్లాస్టర్ అంటున్నారు. అయితే ఇదంతా నితీష్ కుమార్ రెడ్డికి ఆషామాషీగా రాలేదు. గాజువాక సమీపంలోని ఓ చిన్న అద్దె ఇంట్లో నుంచి ప్రారంభమైన ఆయన జీవితం ఇవాళ మెల్బోర్న్ జేజేలు అందుకునేవరకూ వచ్చింది. భవిష్యత్లో ఇంకా ఎన్నో శిఖరాలు అధిరోహిస్తాడు. ఎందుకంటే ఆయన పడిన స్ట్రగుల్ ..చూపించిన పట్టుదల అటువంటిది.
పేద కుటుంబంలో పుట్టినా క్రికెట్ ప్రపంచంలో ఎదుగుతున్న ఎన్కేఆర్
21 ఏళ్ల కిందట గాజువాక సమీపంలో హిందూస్థాన్ జింక్ ఉద్యోగి ముత్యాలరెడ్డి తనకు కుమారుడు పుట్టాడని మురిసిపోయాడు. కానీ మంచి భవిష్యత్ ఇచ్చేలా పెంచగలనా అని మధనపడ్డాడు. కానీ తన శక్తిలోపం ఉండకూడదనుకున్నాడు. అలా ముత్యాలరెడ్డి కుమారుడు నితీష్ రెడ్డి పదేళ్లకే క్రికెట్ పై ఆసక్తి పెంచుకున్నాడు. మంచి ప్రతిభ చూపుతున్నాడు. అప్పుడు ముత్యాలరెడ్డి క్రికెట్లో తన కుమారుడ్ని ప్రోత్సహించాలని నిర్ణయించుకున్నాడు. కానీ దురదృష్టవశాత్తూ ఆయన పని చేస్తున్న కంపెనీ యూనిట్ క్లోజ్ అయింది. గుజరాత్ యూనిట్ కు వస్తే ఉద్యోగం ఇస్తామన్నారు. కానీ తన కుమారుడి క్రికెట్ కోసం అండగా ఉండాలని ఉద్యోగం వదులుకున్నారు. అప్పటి నుంచి ముత్యాలరెడ్డి ఎంత శ్రమించాడో చెప్పాల్సిన పనిలేదు. తండ్రి శ్రమను చూస్తూ తన లక్ష్యాన్ని అందుకోవడానికి నితీష్ శ్రమించాడు.
క్రికెట్లో లభించే విజయాలే స్ఫూర్తిగా ముందడుగు
ఇప్పటికీ నితీష్ కుమార్ రెడ్డి కుటుంబానికి సొంత ఇల్లు లేదు. ఆటల్లో వచ్చిన ట్రోఫిలను పెట్టుకోవడానికి ప్రత్యేకమైన అల్మరాలు కూడా లేవు. ఏదైనా ప్రైజ్ మనీ వచ్చినప్పుడు నితీష్ కుమార్ ఆటను మెరుగుపరచుకోవడానికి అవసరమైన సౌకర్యాలు కల్పించేవారు. ఆయన శ్రమ వృధాపోలేదు. రంజీల్లో ఆయన చూపించిన ప్రతిభతో ఐపీఎల్కు వచ్చారు. అక్కడ్నుంచి జాతీయ జట్టుకు వచ్చారు. ఇప్పుడు మెల్బోర్న్లో తన టాలెంట్ ప్రపంచం ముందు ఉంచాడు. ఇప్పుడు ముత్యాలరెడ్డి ఆనందం ఎంత ఉంటుందో.. తన తండ్రి తన కోసం ఏం త్యాగం చేశాడో.. అ త్యాగానికి సరైన విజయాన్ని అందించానని నితీష్ కుమార్ రెడ్డి కూడా సంతోషంగా ఉంటారు.
తెలుగు వారి కపిల్ దేవ్.. నితీష్ కుమార్ రెడ్డి
నితీష్ కుమార్ రెడ్డి పేదరికంలో పుట్టినా క్రికెట్ మన కోసం కాదని ఎప్పుడూ అనుకోలేదు. ఆ ఆలోచన మనసులోకి రానీయకుండా కష్టపడ్డారు. ఇవాళ భారత్ కు భవిష్యత్ సూపర్ స్టార్ నని నిరూపించుకుంటున్నారు. నితీష్ కుమార్ కెరీర్.. ఉన్నతంగా ఉంటుందనడానికి ఆయన ఎదిగి వచ్చిన మెట్లే సాక్ష్యం. అమాంతం పైకి ఎక్కేవారు ఒక్కసారే అలా పడిపోతారేమోకానీ.. నితీష్ లాగా శ్రమతో ఒక్కో మెట్టు ఎక్కుతూ వచ్చినవారి కెరీర్ సుదీర్ఘంగా ఉంటుంది. ఆయన ఖచ్చితంగా క్రికెట్లో తెలుగువారికి ఓ కపిల్ దేవ్ అవడానికి అవకాశం ఉంది.
