జగన్ అక్రమాస్తుల కేసులో.. షరతులతో కూడిన బెయిల్ మీద ఉన్న నిమ్మగడ్డ ప్రసాద్ .. సెర్బియాలోనూ అదే తరహా బెయిల్ పొందారు. వాన్పిక్ ప్రాజెక్ట్ పేరుతో “రస్ అల్ ఖైమా”ను మోసం చేసిన కేసులో ఆయనను ఇంటర్ పోల్ పోలీసులు సెర్బియా రాజధాని బెల్గ్రేడ్లో అదుపులోకి తీసుకున్నారు. ఐదు రోజులుగా ఆయనను.. పోలీసులు ప్రశ్నిస్తున్నారు. సెర్బియా చట్టాల ప్రకారం.. ఆయన తరపు న్యాయవాదులు .. అక్కడ బెయిల్ పిటిషన్ దాఖలు చేయడంతో… ఆ మేరకు అక్కడి కోర్టు అవకాశం ఇచ్చింది. బెయిల్ మంజూరు చేసింది. కానీ.. సెర్బియా దాటి వెళ్లకూడదని స్పష్టం చేసింది. కేసుకు సంబంధించి విచారణ పూర్తయ్యే వరకూ.. సెర్బియాలోనే ఉండాలని స్పష్టం చేసింది. దీంతో.. నిమ్మగడ్డకు.. బెయిల్ లభించినప్పటికీ.. సెర్బియాలోనే ఉండాల్సిన పరిస్థితి ఏర్పడింది.
మరో వైపు రస్ అల్ ఖైమా… ప్రభుత్వం.. నిమ్మగడ్డను.. తమ దేశానికి అప్పగించాలని కోరుతూ.. సెర్బియా ప్రభుత్వానికి లేఖ రాసినట్లుగా తెలుస్తోంది. తమను మోసం చేశారని.. తమ వద్ద నమోదైన కేసుల వివరాలతో.. సెర్బియాకు విజ్ఞాపన పంపినట్లుగా ప్రచారం జరుగుతోంది. గల్ఫ్ దేశాలతో యూరప్కు నేరస్తుల అప్పగింత ఒప్పందాలు ఉన్నాయి. ఈ ఒప్పందాల ఆధారంగా.. నిమ్మగడ్డ ప్రసాద్ను తమ దేశానికి తరలించేందుకు రస్ అల్ ఖైమా ప్రయత్నిస్తున్నట్లుగా తెలుస్తోంది. మరో వైపు.. సెర్బియా చట్టాల ప్రకారం.. నిమ్మగడ్డకు బెయిల్ వచ్చినప్పటికీ… అక్కడి నుంచి.. స్వదేశానికి చేరుకోవడం అంత తేలిక కాదన్న అభిప్రాయం.. న్యాయనిపుణుల్లో ఉంది.
నిమ్మగడ్డ ప్రసాద్… ఇండియా నుంచి విదేశాలకు వెళ్లడానికి కోర్టు పర్మిషన్ తీసుకోవాల్సి ఉంటుంది. కోర్టు అనుమతి ఇస్తేనే ఆయన విదేశాలకు వెళ్లాలి. అలా పర్మిషన్ తీసుకునే ఆయన సెర్బియాకు విహారయాత్రకు వెళ్లారు. కానీ ఇప్పుడు.. అక్కడ ఇరుక్కుపోయారు. హైదరాబాద్ సీబీఐ కోర్టులో జమ చేసిన పాస్పోర్టును తీసుకుని… సెర్బియా వెళ్తే.. ఇప్పుడు అక్కడి పోలీసులు ఆ పాస్పోర్టును స్వాధీనం చేసుకున్నారు. ఇప్పుడు ఇండియా రావాలంటే.. అక్కడి కోర్టు మళ్లీ అనుమతి ఇచ్చి పాస్పోర్టు అంగీకరించాలి. నిమ్మగడ్డ పరిస్థితి ఎక్కడికి వెళ్లినా… కోర్టు అనుమతి ద్వారానే అన్నట్లుగా పరిస్థితి మారిపోయింది.
