కార్తికేయకు సీక్వెల్ చేయాలని వుందని నిఖిల్ ఎప్పటి నుంచో చెబుతూనే ఉన్నాడు. దర్శకుడు చందూ మొండేటి నాగచైతన్యతో వరుసగా రెండు సినిమాలు తీసి, బిజీ అయిపోవడంతో `కార్తికేయ 2` స్క్రిప్టు సిద్ధమైనా ఇంత వరకూ పట్టాలెక్కలేదు. ఎట్టకేలకు ఈ సినిమాకి శ్రీకారం చుట్టడానికి నిఖిల్ సిద్ధమైపోయాడు. కార్తికేయ 2కి సంబంధించిన అధికారిక ప్రకటన వచ్చేసింది. రేపు (శనివారం) నిఖిల్ పుట్టిన రోజు సందర్భంగా పీపుల్స్ మీడియా ఫ్యాక్టరీ ఈ చిత్రాన్ని నిర్మించబోతున్నట్టు అధికారికంగా ప్రకటించేసింది. “కార్తికేయతో పోలిస్తే సీక్వెల్ సరికొత్తగా ఉంటుంది. ఇది పర్ఫెక్ట్ సీక్వెల్ అని చెప్పుకోవచ్చు. ఇతర నటీనటులు, సాంకేతిక నిపుణుల వివరాలు త్వరలో ప్రకటిస్తామ“ని చిత్రబృందం తెలిపింది. కార్తికేయ కథ ఎక్కడైతే ఆగిందో – అక్కడి నుంచే సీక్వెల్ కూడా మొదలవ్వబోతోందట. `కార్తికేయ`లో నిఖిల్ సరసన స్వాతి నటించింది. మరి ఇప్పుడు కథానాయికగా ఎవరిని ఎంచుకుంటారో చూడాలి.
సీక్వెల్కి రంగం సిద్ధం చేసుకున్న నిఖిల్
