బాలకృష్ణ ఇప్పుడు ఫుల్ బిజీ. ఊపిరి సలపని షెడ్యూల్స్ తో గడుపుతున్నాడు. హిందూపురం రాజకీయాలు, బసవతారకం ఆసుపత్రి వ్యవహారాలు చూసుకొంటూనే సినిమాల పని పూర్తి చేస్తున్నాడు. ప్రస్తుతం బాబి దర్శకత్వంలో బాలయ్య ఓ సినిమా చేస్తున్న సంగతి తెలిసిందే. ఇటీవలే కొత్త షెడ్యూల్ ప్రారంభమైంది. కొన్ని కీలక సన్నివేశాలు పూర్తి చేశారు. ఇప్పుడు చిత్రబృందం రాజస్థాన్ వెళ్లబోతోంది. అక్కడ కొన్ని సన్నివేశాలు, యాక్షన్ ఘట్టాలు తెరకెక్కిస్తారు. ఈ షెడ్యూల్ దాదాపు రెండు వారాల పాటు ఉండబోతోంది.
ఈ చిత్రం కోసం ‘వీర మాస్’ అనే టైటిల్ ప్రచారంలో ఉంది. అయితే చిత్రబృందం అధికారికంగా ఇంకా ధృవీకరించలేదు. ప్రగ్యా జైస్వాల్ ఓ కథానాయికగా నటిస్తోంది. ఊర్వశీ రౌటాల ఉన్నా, ఆమె పాత్ర కేవలం వ్యాంప్ తరహాగా మాత్రమే ఉండబోతోందని టాక్. సితార ఎంటర్టైన్మెంట్స్ ఈ చిత్రాన్ని రూపొందిస్తున్న సంగతి తెలిసిందే. ఇందులో బాలకృష్ణ బందిపోటుగా కనిపించున్నాడని సమాచారం. బాలయ్య పాత్ర రూపు రేఖలేంటి అనే విషయంలో ఇప్పటి వరకూ చిత్రబృందం ఎలాంటి క్లూ ఇవ్వలేదు. త్వరలోనే ఓ టీజర్ వదలబోతున్నారని, ఆ టీజర్ తోనే టైటిల్ తో పాటుగా బాలయ్య పాత్రని పూర్తి స్థాయిలో పరిచయం చేస్తారని సమాచారం.
