బి.బి#3.. బాల‌కృష్ణ‌, బోయ‌పాటి శ్రీ‌ను కాంబినేష‌న్ లో తెర‌కెక్కుతున్న ఈ చిత్రాన్ని ఇలానే పిలుచుకుంటున్నారు. ఆ త‌ర‌వాత బి.బి.బి కూడా రాబోతోంది. అంటే బాల‌య్య‌, బి.గోపాల్‌, బుర్రా సాయిమాధ‌వ్ ల సినిమా అన్న‌మాట‌. బి.గోపాల్ తో ఓ సినిమా చేస్తాన‌ని బాల‌య్య ఇది వ‌ర‌కే మాటిచ్చాడు. కానీ.. బాల‌య్య‌కు స‌రిప‌డా క‌థ‌ని త‌యారు చేసుకోవ‌డంలో బి.గోపాల్ విఫ‌లం అయ్యారు. దాంతో ఈకాంబో ఉంటుందా, లేదా? అనే డౌటు మొద‌లైంది. ఎట్ట‌కేల‌కు బి.గోపాల్ ఓ క‌థ‌ని రెడీ చేసేసిన‌ట్టు టాక్‌. ప్ర‌ముఖ ర‌చ‌యిత బుర్రా సాయిమాధ‌వ్ బాల‌య్య కోసం ఓ క‌థ రాశారు. అది.. బి.గోపాల్ చేతిలో ప‌డింది. ఇప్పుడు ఈ క‌థ‌తోనే బాల‌య్య‌తో సినిమా చేయ‌బోతున్నార్ట‌. ఇప్ప‌టికే లైన్ సిద్ధ‌మైంది. ఒక‌ట్రెండు రోజుల్లో బాల‌య్య‌తో సిట్టింగ్ వేయ‌బోతున్నారు. బాల‌య్య‌కీ న‌చ్చితే.. ఈ సినిమా ప‌నులు మొద‌లైపోతాయి. బోయ‌పాటి సినిమా పూర్త‌వ్వ‌గానే ఇదే ప‌ట్టాలెక్క‌బోతోంది. మ‌రోవైపు వినాయ‌క్ కూడా బాల‌య్య కోసం ఓ కథ‌ని సిద్ధం చేస్తున్నారు. లూసీఫ‌ర్ రీమేక్ ప‌నుల‌తో పాటుగానే బాల‌య్య క‌థ‌పైనా వినాయ‌క్ వ‌ర్క్ చేస్తున్న‌ట్టు తెలుస్తోంది.