అందాల రాక్షసి దర్శకుడు హను రాఘవపూడి ప్రస్తుతం నాని సినిమాను దర్శకత్వం చేస్తున్నాడని తెలిసిందే. సినిమా మొత్తం అనంతపురం నేపథ్యంలో జరుగుతుందట. అంతేకాదు సినిమాలో బాలయ్య వీరాభిమానిగా నటిస్తున్నాడటం విశేషం. అయితే మొన్నటిదాకా ఈ సినిమా టైటిల్ జై బాలయ్య, మంగమ్మ గారి మనవడు అని పెడుతున్నారంటూ వార్తలు వచ్చాయి. కాని తెలుస్తున్న సమాచారం ప్రకారం ఈ సినిమా టైటిల్ ‘కృష్ణ గాడి వీర ప్రేమగాధ’ అని పెట్టబోతున్నారట.
తన మొదటి సినిమాతోనే ప్రేమకథలను పర్ఫెక్ట్ గా తెరకెక్కించగల సత్తా తనకుందని చాటుకున్న దర్శకుడు హను రాఘవపూడి నాని సినిమాను కూడా అద్భుతమైన ప్రేమకథగా తీర్చిదిద్దుతున్నాడు. సినిమాలో హీరోయిన్ గా ముంబై మోడల్ మెహరెనె పిర్జాదా నటిస్తుంది. టైటిల్ చాలా లెంథీగా ఉన్నా సినిమా కథకు సరిపోతుందని నాని సినిమా టైటిల్ కృష్ణ గాడి వీర ప్రేమగాధ అని నిర్ణయించారట.
ఇటీవల విడుదలైన భలే భలే మగాడివోయ్ సినిమాతో బ్లాక్ బస్టర్ హిట్ కొట్టిన నాని ఈ సినిమాను కూడా అదే రేంజ్ హిట్ కొట్టాలనే ప్లాన్ తో జాగ్రత్తలు తీసుకుంటున్నాడు. 14 రీల్స్ బ్యానర్లో రామ్ ఆచంట, గోపీ ఆచంట, అనీల్ సుంకర కలిసి ఈ సినిమాను నిర్మిస్తున్నారు. ప్రస్తుతం చిత్రీకరణ దశలో ఉన్న ఈ సినిమా గురించి మరిన్ని వివరాలు త్వరలో తెలిసే అవకాశం ఉంది.
