`మా` ఎన్నిక‌ల వేడి మ‌రింత రాజుకుంది. ప్ర‌కాష్ రాజ్, విష్ణుల మ‌ధ్య నువ్వా నేనా? అనే పోటీ సాగుతోంది. ప్ర‌కాష్‌రాజ్ పై విష్ణుదే పైచేయి అని అనిపిస్తున్న ఈ ద‌శ‌లో – నాగ‌బాబు రంగ ప్ర‌వేశం చేశారు. `మా స‌పోర్ట్ పూర్తిగా ప్ర‌కాష్ రాజ్‌కే` అని క్లారిటీ ఇచ్చేశారు. ప్ర‌కాష్ రాజ్‌కి మెగా స‌పోర్ట్ ఉంద‌న్న‌ది ముందు నుంచీ తెలిసిన విష‌య‌మే. చిరు ఆశీస్సుల‌తోనే ప్ర‌కాష్ రాజ్ `మా` ఎన్నిక‌ల బ‌రిలో దిగారు. అయితే.. మా రాజ‌కీయం వేడెక్కిన త‌ర‌వాత మెగా హీరోలెవ‌రూ స్పందించ‌లేదు. నాగ‌బాబు సైతం సైలెంట్ గా ఉండ‌డంతో మెగా కాంపౌండ్ ప్ర‌కాష్ రాజ్ కి స‌పోర్ట్ చేస్తోందా? లేదా? అనే అనుమానాలు వ్య‌క్తం అయ్యాయి. ఈ ద‌శ‌లో నాగ‌బాబు ఎంట్రీ ఇచ్చి… ఆ అనుమానాల్ని ప‌టాపంచ‌లు చేశారు.

ప్ర‌కాష్ రాజ్ కి నాగ‌బాబు స‌పోర్ట్ చేయ‌డ‌మే కాదు.. ప్ర‌త్య‌ర్థి వ‌ర్గాన్ని న‌డిపిస్తున్న న‌రేష్ పై కౌంట‌ర్లు వేశారు. తుమ్మినా, ద‌గ్గినా ప్రెస్ మీట్ పెడుతున్నార‌ని, ఒక వ్య‌క్తి వ‌ల్ల తాను మళ్లీ మీడియా ముందుకు రావాల్సివ‌చ్చింద‌ని, ఆ వ్య‌క్తి న‌రేష్ అని డైరెక్ట్ ఎటాక్ చేశారు. ప్ర‌కాష్ రాజ్ మంచివాడ‌ని, తెలివైన వాడ‌ని, అనుభ‌వ‌జ్ఞుడ‌ని, ఇన్ని ల‌క్ష‌ణాలు ఒకే వ్య‌క్తిలో ఇమిడి ఉండ‌డం చాలా అరుద‌ని, అలాంటి వ్య‌క్తిని గెలిపించుకోవాల‌న్నారు. లోక‌ల్ – నాన్ లోక‌ల్ గొడ‌వ‌పై కూడా ఆయ‌న మాట్లాడారు. `ప్ర‌కాష్ రాజ్ దేశానికి ప్రాతినిథ్యం వ‌హిస్తున్న న‌టుడు. కోటి రూపాయ‌ల పారితోషికం తీసుకోగ‌ల న‌టుడు. అత‌నికి బాషా బేధమేముంది? చిన్న, పెద్ద సినిమాల‌కు ప్ర‌కాష్ రాజ్ కావాలి` అన్నారు. “నాకంటే అన్న‌య్య‌కి చాలా ద‌గ్గ‌రి వాడు ప్ర‌కాష్ రాజ్‌. అన్న‌య్య‌కు ద‌గ్గ‌రైతే మా అంద‌రికీ ద‌గ్గ‌రైన‌ట్టే. మా స‌హ‌కారం త‌న‌కి త‌ప్ప‌కుండా ఉంటుంద‌న్నారు నాగబాబు.