`అలా ఎలా` సినిమాతో ఆక‌ట్టుకున్న ద‌ర్శ‌కుడు అనీష్ కృష్ణ‌. త‌న‌తో నాగ‌శౌర్య సినిమా ఓకే అయ్యింద‌న్న వార్త ఇండ్ర‌స్ట్రీలో చ‌క్క‌ర్లు కొడుతోంది. శౌర్య చేతిలో చాలా ప్రాజెక్టులున్నాయి. మీడియం రేంజు సినిమాల‌కు నాగ‌శౌర్య మోస్ట్ వాంటెడ్ హీరోగా మారిపోయాడు. త‌న కాల్షీట్లు మ‌రో మూడేళ్ల వ‌ర‌కూ ఖాళీ లేవు. ఈ ద‌శ‌లో శౌర్య‌తో – అనీష్ సినిమా ఓకే అవుతుందా? లేదా? అనుకున్నారు. కానీ ఎట్ట‌కేల‌కు ఈ సినిమా ఖ‌రారైపోయింది. ఈనెల 25న ఈ చిత్రాన్ని లాంఛ‌నంగా మొద‌లెడ‌తాడ‌రు. మ‌హ‌తి సాగ‌ర్ ని సంగీత ద‌ర్శ‌కుడిగా ఎంచుకున్నారు. `ఛ‌లో` సినిమాకి మంచి బాణీల్ని అందించి, ఆ సినిమా విజ‌యంలో భాగ‌స్వామి అయ్యాడు మ‌హ‌తి. అందుకే నాగ‌శౌర్య మ‌రోసారి త‌న‌పై న‌మ్మకం ఉంచాడు. ఛ‌లోకి కెమెరామెన్ గా ప‌నిచేసిన సాయి శ్రీ‌రామ్ నే ఛాయాగ్ర‌హ‌ణ బాధ్య‌త‌లు చేప‌ట్ట‌నున్నాడు. ఇదో రొమాంటిక్ కామెడీ సినిమా. క‌థ బాగా న‌చ్చ‌డంతో నాగ‌శౌర్య త‌న హౌం బ్యాన‌ర్ ఐరాలోనే చేయ‌డానికి ఫిక్స‌యిపోయాడు. క‌థానాయిక కూడా ఓకే అ‌యిపోయింది. బాలీవుడ్ నుంచి ఓ కొత్త‌మ్మాయిని హీరోయిన్ గా రంగంలోకి దించ‌నున్నారు. ఆ క‌థానాయిక ఎవ‌ర‌న్న‌ది త్వ‌ర‌లో తెలుస్తుంది.