పూరి సినిమాల్లో హీరోలు చాలా హైపర్ యాక్టీవ్గా ఉంటారు. వాళ్ల జోష్ చూస్తే.. థియేటర్లో కూర్చున్న ప్రేక్షకుడికీ పూనకాలు వచ్చేస్తాయి. పూరి సక్సెస్ సీక్రెట్ ఇదే. అయితే ‘ఇస్మార్ట్ శంకర్’ కోసం హీరోయిన్ పాత్రల్నీ ఇలానే డిజైన్ చేశాడు పూరి. నభా నటేషా పాత్రని అయితే ఓ రేంజ్లో చూపించేస్తున్నాడు. ‘వరంగల్ పోరగాల్ని ఉచ్చ పోయించా’ అంటూ రౌడీలా డైలాగులు పేల్చేస్తోంది. రామ్ పాత్రే ఫుల్ ఎనర్జిటిక్గా ఉంటుందనుకుంటే – నభా పాత్ర అందుకు ఏమాత్రం తీసిపోకుండా ఉండబోతోందట. ఈ సినిమాలో అందరినీ రామ్ కొడుతుంటే రామ్ని మాత్రం నభా కొడుతుందట. ఈ విషయాన్ని నభా నటేషానే చెప్పింది.
” ఈ సినిమా కోసం రామ్ నా చేతిలో దెబ్బలు తిన్నాడు. అదెందుకో సినిమా చూస్తే మీకే అర్థం అవుతుంది. నేను చిన్నప్పటి నుంచీ చాలా హైపర్ యాక్టీవ్గా ఉంటుండేదాన్ని. ఇప్పుడు నాకు అలాంటి పాత్రలే వస్తున్నాయి” అని చెప్పుకొచ్చింది. ఈ సినిమా కోసం నభా తెలంగాణ యాసని ప్రత్యేకంగా నేర్చుకుందట. సినిమా మొదలవ్వడానికి ముందే పూరి స్క్రిప్టుని పంపిస్తే.. ఇంటి దగ్గరే ఉండి.. ఆ డైలాగుల్ని బట్టి పట్టిందట. ”ఈ సినిమాలో నేను తెలంగాణ యాసలో మాట్లాడతా. ఆ భాష, యాస చాలా గొప్పవి. క్లిష్టంగానూ ఉన్నాయి. అందుకే నేర్చుకోవడానికి టైమ్ పట్టింది. అయితే డబ్బింగ్ మాత్రం నేను చెప్పుకోలేదు. త్వరలో ఆ ప్రయత్నం కూడా చేస్తా” అంటోంది. ప్రస్తుతం రవితేజ నటిస్తున్న ‘డిస్కోరాజా’లో నభా కథానాయికగా నటిస్తోంది. ‘ఇస్మార్ట్..’ హిట్టయితే నభాకు స్టార్ హీరోల చిత్రాల నుంచి అవకాశాలు రావడం ఖాయం.
