భారతీయ పార్టీలో ప్రస్తుతం సీనియర్లకు దక్కుతున్న గౌరవం ఏపాటిదో చూస్తూనే ఉన్నాం. కొద్ది నెలల కిందట… ఓ బహిరంగ సభలో ఎల్ కే అద్వానీకి ప్రధాని మోడీ ఇచ్చిన ప్రాధాన్యత ఏపాటిదో దేశమంతా చూసింది. ఒకప్పటి భారతీయ జనతా పార్టీ వేరు, మోడీ నాయకత్వంలోని ప్రస్తుత పార్టీ వేరనేది ప్రత్యేకంగా చెప్పాల్సిన పనిలేదు. ప్రస్తుతం పార్టీ నడుతుస్తున్న తీరు మీద సీనియర్లలో కొంత ఆవేదన ఉందన్నది వాస్తవం. ఓ పత్రికకు ఇచ్చిన ఇంటర్వ్యూలో సీనియర్ నేత మురళీ మనోహర్ జోషి చేసిన వ్యాఖ్యల్లో అది స్పష్టంగా కనిపిస్తోంది.
అభివృద్ధి అనేది సహజమనీ, అలాగే అధోగతి కూడా అంతే సహజమైందనీ.. ఒక్కోసారి మంచి పరిణామాలు చోటు చేసుకుంటున్నట్టు, దుష్పరిణామాలు కూడా ఉంటాయని జోషీ వ్యాఖ్యానించారు. దక్షిణాదిన పార్టీ పరిస్థితి గురించి మాట్లాడుతూ… భాజపా చేజేతులా పరిస్థితి చెడగొట్టుకుందన్నారు. ఏపీ ముఖ్యమంత్రి నారా చంద్రబాబు నాయుడుతో సంబంధాలు దెబ్బతినడానికి కారణం పార్టీ స్వయంకృతమేనని చెప్పారు. ఆంధ్రాతోపాటు తెలంగాణలో కూడా ఇదే పరిస్థితి భాజపాకి ఎదురైందని మురళీ మనోహన్ జోషి అభిప్రాయపడ్డారు. తమిళనాడులో కూడా పార్టీ పరిస్థితి బాగులేదని ఆవేదన వ్యక్తం చేశారు.
నిజానికి, టీడీపీ విషయంలో భాజపా సీనియర్ నేతలు అప్పట్లో పట్టు విడుపు ధోరణి అవలంభించేవారు. వాజ్ పేయి, ఎల్కే అద్వానీ, మురళీ మనోహర్ జోషి వంటి సీనియర్లు పార్టీలో యాక్టివ్ గా ఉన్న రోజుల్లో.. చంద్రబాబుకి చాలా ప్రాధాన్యత ఇచ్చేవారు. అంశాలవారీగా కేంద్ర రాష్ట్రాల మధ్య కొన్ని తేడాలు ఉన్నప్పటికీ… కొంత సర్దుబాటు ధోరణితో వ్యవహరించబట్టే భాజపా-టీడీపీల బంధం అన్నేళ్లపాటు సుదీర్ఘంగా కొనసాగింది. కానీ, మోడీ షా ద్వయం చేతికి పార్టీ వచ్చాక… సర్దుబాటు ధోరణి అనే ఊసే లేదు. వారి ఆజ్ఞలు శిరసావహించాలి, లేదంటే పక్కకు తప్పుకోవాలి! ఈ తీరువల్లనే సహజ మిత్రులు దూరం జరుగుతున్న పరిస్థితి. టీడీపీ కూడా అలానే దూరమైపోయింది.
మోడీ వచ్చాక పార్టీ వ్యవహార శైలిలో నియంతృత్వ పోకడలు పెరిగాయన్నది చాలామంది అభిప్రాయం. అందుకు సాక్ష్యమే టీడీపీ విషయంలో అనుసరిస్తున్న తీరు. ఈ అసంతృప్తి సీనియర్ నేతల నుంచి కూడా వ్యక్తం కావడం గమనార్హం. ఆంధ్రా, తెలంగాణల్లో భాజపాకి ఆదరణ లేకుండా చేసుకోవడం మోడీ వ్యవహార శైలే కారణమని చెప్పకనే చెబుతున్నారు మురళీ మనోహర్ జోషి. దీన్ని అంగీకరించే పరిస్థితి పార్టీలో అస్సలు లేదు.
