మంచు మోహ‌న్ బాబు, విష్ణు, ల‌క్ష్మీ ప్ర‌స‌న్న మాట‌ల్లో కాస్త అతిశ‌యోక్తులు క‌నిపిస్తుంటాయి. దాంతో అన‌వ‌స‌రంగా ట్రోల్ అవుతుంటారు. వీళ్లెప్పుడు మీడియా ముందుకు వ‌చ్చినా.. మీమ్స్ కి కంటెంట్ ఇచ్చి వెళ్తుంటారు. తాజాగా మోహ‌న్ బాబు కూడా అదే చేశారు. తిరుమ‌ల వెళ్లిన మోహ‌న్ బాబు అక్క‌డ మీడియాతో మాట్లాడుతూ త్వ‌ర‌లోనే మంచు విష్ణు ఓ వంద కోట్ల భారీ బ‌డ్జెట్ సినిమా తీయ‌బోతున్నాడ‌ని ప్ర‌క‌టించారు.

విష్ణు సినిమా తీయ‌డంలో త‌ప్పు లేదు. అది హీరోగా, నిర్మాత‌గా ఆయ‌న హ‌క్కు. కాక‌పోతే వంద కోట్లు అని చెప్పుకోవ‌డ‌మే జోక్ గా మారింది. విష్ణు ఓ హిట్ సినిమా తీస్తే.. దాదాపు రూ.20 కోట్లు వ‌సూలు చేస్తోందేమో..? హీరోగా విష్ణు స్టామినా అంతే. అది ఎవ‌రు ఒప్పుకొన్నా, ఒప్పుకోక‌పోయినా న‌మ్మాల్సిన నిజం. ఆమ‌ద్య విష్ణు ‘మోస‌గాళ్లు’ అనే సినిమా తీశాడు. ఈ సినిమాకి ఏకంగా రూ.50 కోట్లు ఖ‌ర్చు పెట్టామ‌ని, హాలీవుడ్ వెర్ష‌న్ కూడా రెడీ చేశామ‌ని ప్ర‌చారం చేసుకొన్నారు. అయితే తీరా సినిమా విడుద‌ల‌య్యాక అస‌లు క‌థ అర్థ‌మైపోయింది. ఆ సినిమాకి రూ.20 కోట్లు కూడా ఖ‌ర్చు పెట్ట‌లేద‌ని తేలిపోయింది. ‘భ‌క్త‌క‌న్న‌ప్ప‌’ సినిమాని అప్పుడెప్పుడో రీమేక్ చేద్దామ‌నుకొన్నాడు. అప్పట్లో విష్ణు కాస్తో కూస్తో ఫామ్‌లో ఉన్నాడు కూడా. కానీ ఆ సినిమాకి రూ.60 కోట్లు బ‌డ్జెట్ అనేస‌రికి.. వెన‌క‌డుగు వేశాడు. అప్ప‌ట్లో రూ.60 కోట్లు పెట్టి సినిమా తీయ‌లేదు. ఇప్పుడు వంద కోట్లు పెడ‌తారా? అనేది పెద్ద ప్ర‌శ్న‌. అందుకే మోహ‌న్ బాబు మాట‌లు కామెడీగా తీసుకొంటున్నారు జ‌నాలు.