బార్క్ ప్రకటించిన తెలుగు న్యూస్ చానల్స్ రేటింగ్స్ కామెడీ అయిపోయాయి. రియాలిటీకి ఎక్కడా దగ్గరగా లేకపోవడంతో నెంబర్ వన్ అని సంతోషపడుతున్న చానల్స్ ఉద్యోగులు కూడా కామెడీ చేసుకుంటున్నారు. రేటింగ్స్ ట్యాంపర్ చేస్తున్నారన్న కారణంగా కేసులు నమోదు కావడంతో న్యూస్ చానల్స్కు బార్క్ చాలా కాలం పాటు రేటింగ్లు నిలిపివేసింది. వివిధరకాల పరిణామాల తర్వాత కేంద్ర సమాచార శాఖ జోక్యం చేసుకుని న్యూస్ చానళ్లకు రేటింగ్లు ఇవ్వాలని ఆదేశించింది. దీంతో బార్క్ మళ్లీ రేటింగ్లు ఇవ్వడం ప్రారంభించారు.
ఎన్టీవీ ఈ మధ్య కాలంలో చేసిన అద్భుతాలేమున్నాయని అంత రేటింగ్స్ !?
ఇటీవల బార్క్ రేటింగ్స్ ప్రకటించింది. ఈ రేటింగ్లు చూసి అందరికీ మైండ్ బ్లాంక్ అయిపోయింది. ఎందుకటే ఎన్టీవీ న్యూస్ చానల్ ఎవరికీ అందనంత ఎత్తులో ఉండిపోయింది. రెండో స్థానంలో ఉన్న టీవీ9 కి మొదటి స్థానంలో ఉన్న ఎన్టీవీకి తేడా 20 పాయింట్లకుపైగా ఉంది. ఇదెలా సాధ్యమో మీడియాలో పండిపోయిన వారికీ అర్థం కాలేదు. ఇటీవలి కాలంలో ఎన్టీవీ ప్రజా ఉద్యమాలు చేసిందా.. వారి ఇళ్లలోకి చొచ్చుకుపోయే కార్యక్రమాలు చేసిందా అని చాలా మంది ఆలోచించారు. కానీ అలాంటివేమీ కనిపించలేదు. రెండు తెలుగు రాష్ట్రాల ప్రభుత్వాలకు అనుకూల వార్తలు ఇస్తూ బాధితుల పక్షమే నిలబడటం మానేశారు. అదే సమయంలో మరి టెక్నికల్గా ఏమైనా గొప్ప మార్పులు తెచ్చి విజువల్ వండర్స్ చూపిస్తున్నారా అంటే అదీ లేదు. అసలు అత్యంత సాదాసీదాగా సాగిపోతున్న న్యూస్ చానల్స్లో ఎన్టీవీ అగ్రభాగంలో ఉంది. మరి ఆ చానల్కు రేటింగ్స్ ఎలా వచ్చాయి..?
వనిత టీవీని అంత మంది చూస్తున్నారా ? నిజంగానే !?
సరే అనుకుంటే ఆ చానల్ గ్రూప్లో ఉన్న రెండు ఉనికి లేని చానల్స్ ఉన్నాయి. ఒకటి భక్తి.. రెండు వనిత. భక్తి చానల్కు… దీపోత్సవం లాంటివి పెట్టినప్పుడు కాస్త రేటింగ్స్ వస్తాయి.. మిగిలిన రోజుల్లో చాలా పరిమితమైన ఆడియన్స్ ఉంటారు. ఇక వనిత చానల్కు అసలు వ్యూయర్ షిప్ ఉన్నట్లుగా ఎవరూ అనుకోరు. కానీ అనూహ్యంగా ఈ గ్రూప్లోని భక్తి, వనిత చానళ్లకు రేటింగ్లు పెరిగిపోయాయి. అంటే ఎన్టీవీ గ్రూప్లోని మూడు చానళ్లకు రేటింగ్లు భారీగా పెరిగిపోయాయి. ఇవి రేటింగ్లు ఆపేయాడనికన్నా ముందు రేటింగ్లతోపోలిస్తే అసాధారణంగా ఉన్నాయి. గ్రాడ్యూయల్గా పెరిగితే ఇలా వచ్చే అవకాశం అలేదు. అద్భుతమో.. అక్రమమో చేస్తేనే సాధ్యం. అద్భుతాలు చేయలేదు కాబట్టి అక్రమం అనే ఆరోపణలు రావడానికి కారణం అవుతోంది.
నమ్మలేని రేటింగ్లొస్తే మొదటికే మోసం ! కూర్చున్న కొమ్మను నరక్కున్నట్లే !
రేటింగ్ మీటర్లు తిప్పుతున్నారనేది చాలా కాలంగా ఉన్న అభియోగాలు ఉన్నాయి. ఈ అనుమానాలు చాలా చానళ్లపై ఉన్నాయి. గతంలో స్టింగ్ ఆపరేషన్లు కూడా వెలుగు చూశాయి. టీవీ9 మీద కూడా లెక్క లేనన్ని ఆరోపణలు ఉన్నాయి. ఇప్పుడు అవి ఎన్టీవీ గ్రూప్ మీద వస్తున్నాయి. అసాధారణంగా ఫలితాలు వస్తే ఇదే విధంగా అనుమానాలు వస్తాయి. బార్క్ రేటింగ్లు మళ్ళీ ఇవ్వాలని నిర్ణయించిన తర్వాత పాత వ్యూహాలను మళ్లీ అమలు చేశారనే అనుమానాలు గట్టిగానే వినిపిస్తున్నాయి. వీటిని ఎవరూ నివృతి చేయలేరు. కానీ రేటింగ్స్పై నమ్మకం పోతుంది. పరిస్థితి ఇలాగే ఉంటే రేటింగ్ల వల్ల ఎంత ప్రయోజనం ఉంటుందని చానల్స్ అనుకుంటాయో.. ఆప్రయోజనాలు కూడా రాకుండా పోయే ప్రమాదం ఉంది.
