ఆంధ్రప్రదేశ్కు ఏదీ కలసి రావడం లేదు. రాజధాని పునాదుల్లోనే ఉండిపోయింది. శిథిలమైపోతోంది. మూడు రాజధానులు అంటూ.. ఎటు పోతుందో తెలియని పరిస్థితి. దీంతో ఆంధ్రప్రదేశ్ మీడియా కూడా.. ఆంధ్రప్రదేశ్లో స్థిరపడే అవకాశం కనిపించడం లేదు. ఇంకా చాలా కాలం పాటు హైదరాబాదే కేంద్రంగా ఉండనుంది. నవ్యాంధ్ర తొలి తెలుగుచానల్గా ప్రారంభమైన ఏపీ 24/7 మూతబడింది. గత నాలుగైదు నెలలుగా ఉద్యోగులకు జీతాలివ్వడంలేదు. దాంతో వారు ధర్నాలు చేస్తున్నారు. ఈ సమయంలో చానల్ను మూసేయాలని యాజమాన్యం నిర్ణయించుకుంది.
విజయవాడ కేంద్రంగా మొదలైన చానల్ కు మా టీవీ మాజీ అధినేత మురళీకృష్ణంరాజు చైర్మన్. మరికొంత కూడా పెట్టుబడులు పెట్టారు. మొదట్లో పరవాలేదనుకున్నట్లుగా నడిచింది. ఆంధ్రా ప్రజలు ఓన్ చేసుకునేంత స్టఫ్ లేకపోయినా.. విజయవాడ కేంద్రంగా మీడియా రంగం స్థిరపడటానికి ఓ బేస్ ఏర్పాటయిందని అనుకున్నారు. కానీ ఉద్యోగుల ఆధిపత్య పోరు మొదటికే మోసం తెచ్చింది. ఒక్కొక్కరుగా వైదొలగడం ప్రారంభించారు. చివరికి వెంకటకృష్ణ కూడా వెళ్లిపోయారు. ఆ తర్వాత వైసీపీ నేతలు ఆ చానల్ను తీసుకున్నారని.. మంచి రోజులు వచ్చాయని అనుకున్నారు. సాఫ్ట్ వేర్ కంపెనీలలో సీఈవో గా చేసిన సుధాకర్ ని తీసుకొచ్చినా ప్రయోజనం లేకపోయింది.
వ్యాపార పరంగా ఎదగాలంటే.. అన్ని రంగాలకు కేంద్రం అవ్వాలి. కనీసం.. ఏపీ ప్రజలకు సంబంధించిన వ్యాపారాలైనా అక్కడ్నుంచి సాగాలి. కానీ అలాంటి పరిస్థితులు కనిపించడం లేదు. ఇప్పుడు ఏపీ ప్రజలు.. చదువులు, ఉద్యోగాలు.. చివరికి వైద్య సేవల కోసం కూడా పొరుగు రాష్ట్రాలపై ఆదారపడే పరిస్థితి ఉంది. ఏపీ ప్రజలకు సమాచారం ఇచ్చే మీడియా కూడా హైదరాబాద్ గడ్డపైనే ఉండనుంది. ఇంకెంతకాలమో.. ఎవరూ చెప్పలేరు.
