ఆహా.. ఈమ‌ధ్యే తెర‌పైకి వ‌చ్చిన ఓ ఓటీటీ ఫ్లాట్ ఫామ్‌. అల్లు అర‌వింద్ దీనికి పెద్ద దిక్కు. ఆహా కోసం ప‌దుల సంఖ్య‌లో వెబ్ సిరీస్‌లు త‌యార‌వుతున్నాయి. ఇప్ప‌టికే క్రిష్ ఓ వెబ్ సిరీస్‌ని ఆహా కోసం అందించారు. మ‌రో వెబ్ సిరీస్ ప‌నుల్లో ఉన్నారు. ఇప్పుడు మారుతి కూడా వెబ్ సిరీస్‌ల కోసం క‌లం క‌దిలిస్తున్నారు. మారుతికీ గీతా ఆర్ట్స్ కాంపౌండ్‌కీ ఉన్న అనుబంధం చెప్పాల్సిన ప‌ని లేదు. ఆయ‌న ఆ కాంపౌండ్ వ్య‌క్తే. అందుకే ఇప్పుడు ఓటీటీ ఫ్లాట్ ఫామ్ కోసం కొన్నివెబ్ సిరీస్‌లు సిద్ధం చేయ‌మ‌ని అల్లు అర‌వింద్ మారుతికి పుర‌మాయించారు. వెబ్ సిరీస్‌ల‌కు సంబంధించిన కంటెంట్ వెదికే ప‌నిలో ఉన్నారు మారుతి. త‌న శిష్యుల‌కు సైతం కొన్ని వెబ్ సిరీస్‌లు అప్ప‌గించిన‌ట్టు స‌మాచారం. ప్ర‌స్తుతం కొంత‌మంది యువ ర‌చ‌యిత‌లు, యువ ద‌ర్శ‌కుల‌తో మారుతి మంత‌నాలు జ‌రుపుతున్నారు. క‌నీసం ఐదారు వెబ్ సిరీస్‌లు మారుతి నుంచి రాబోతున్నాయి. వీటికి క‌థ‌, స్క్రీన్ ప్లే లాంటివి మారుతి అందించినా, లేక‌పోయినా.. వాటి వెనుక మారుతి హ‌స్తం ఉండ‌డం సుస్ప‌ష్టం. మారుతి అనే కాదు.. గీతా ఆర్ట్స్‌తో అనుబంధం ఉన్న కొంత‌మంది ద‌ర్శ‌కులు ప్ర‌స్తుతం ఆహా కోసం వెబ్ సిరీస్‌లు అందించే ప‌నిలో బిజీగా ఉన్నారు.