కర్ణాటక రగిలిపోతోంది. స్కూళ్లు, కాలేజీలకు మూడురోజుల పాటు సెలవులు ప్రకటించారు. దీనికి కరోనా కారణం కాదు. హిజాబ్ వివాదం. కర్ణాటకలో ఎక్కడో ఓ స్కూల్లో ప్రిన్సిపాల్ చేసిన నిర్వాకంతో మంట అంటుకుంది. అంతంకంతకూ పెరుగుతోంది. చివరికి అది రాళ్ల దాడులు.. కత్తిపోట్లకూ దారి తీసింది. చివరికి అది ఓ వర్గం మనసుల్లో విష బీజాలు నాటుతుంది. యువత గుండెల్ని రగిలించేలా చేస్తుంది. అది దేశానికి ఎంత మాత్రం క్షేమం కాదు. దేశ ప్రజల మధ్య ఐక్యతాభావానికి ఎంత మాత్రం మేలు కాదు.
కర్ణాటక పరిణామాలతో విభిన్నవర్గాల మధ్య పెరగనున్న దూరం !
మంగళవారం దేశం మొత్తం విపరీతంగా చూసిన వీడియో మాండ్యా జిల్లాలో ఓ విద్యార్థిని హిజాబ్ వస్తధారణలో కాలేజీకి వచ్చి వెళ్తూంటే ఆమె మీదకు వెళ్తూ కొంత మంది విద్యార్థులు కాషాయా కండువాలు ఊపుతూ జై శ్రీరామ్ నినాదాలు చేశారు. దానికి ప్రతిగా ఆమె అల్లాహో అక్బర్ అంటూ నినదించారు. ఆమెను అలా రెచ్చగొడుతూ విద్యార్థులు వెంట పడుతూనే ఉన్నారు. ఈ దృశ్యాలు అందర్నీ కలచి వేస్తున్నాయి. ఎందుకిలా చేస్తున్నారు ? ఇప్పుడు ఆ యువతినిఆ వర్గం మొత్తానికి ప్రతీకగా చూస్తున్నారు. ఆమెకు జరిగిన ఘటన తమకు జరిగినట్లుగా ఆ వర్గం భావిస్తుంది. ఆమెకు మద్దతుగా ఆ వర్గమే కాదు.. కాస్త ఆలోచనా పరులూ ముందుకు వస్తున్నారు. ఈ పరిస్థితి రెండు వర్గాలుగా విభజిస్తోంది.
హిజాబ్ను వ్యతిరేకించాలంటే కాషాయం చూపించాలా ?
హిజాబ్ వేసుకుని విద్యార్థులు స్కులుకు రావాలా వద్దా అన్నదానితో హిందూ సంస్థలకు.. హిందూయిజం అవలంభించేవారికి సంబంధం లేదు. అది కాలేజీ లేదా స్కూల్ నిబంధనలకు సంబంధించిన అంశం. అది కాలేజీ యాజమాన్యం నిర్ణయం తీసుకుంటుంది. లేకపోతే కోర్టు తీసుకుంటుంది.కానీ ఇక్కడ హిందూ సంస్థల పేరుతో కొంత మంది విద్యార్థుల్ని పోగేసి వారికి కాషాయ కండువాలు ఇచ్చి రెచ్చగొట్టే రాజకీయం చేయడంతోనే అసలు విభజన ప్రారంభమయింది. నిన్నటిదాకా వారు కలసి మెలిసి చదువుకున్నారు. కబుర్లు చెబుతున్నారు. ప్రాణ స్నేహితులుగా ఉన్నారు. కానీ రేపటి నుంచి వారి మధ్య ఓ విభజన ఏర్పడుతుంది. అది ఒకరు ఇద్దరు మధ్య కాదు. కర్ణాటక ఆ మాటకొస్తే దేశం మొత్తంలోని విద్యార్థుల మధ్య ఈ విభజన కనిపిస్తుంది. అది దేశానికి క్షేమమా..? మంచిదా ?
మత రాజకీయాలతో దేశానికి నష్టం చేస్తున్న క్షుద్ర రాజకీయాలు !
దేశానికి ఎవరూ చేయనంత హాని మత రాజకీయాలు చేస్తున్నాయి. భవిష్యత్ పౌరుల మనసుల్లోనూ విషబీజాలు నాటుతున్నారు. ఇప్పటికప్పుడు ఇలాంటి వాటి వల్ల రాజకీయ ప్రయోజనాలు లభిస్తాయేమో కానీ దీర్ఘకాలంలో దేశానికి వారు చేసిన నష్టాన్ని ప్రజలు అనుభవించాలి.భావి భారత పౌరులు అనుభవించాలి. ప్రజలకు నిజాలు తెలియకుండా ఎల్లప్పుడూ భావోద్వేగాల్లో ముంచేసేందుకు సోషల్ మీడియా.. దాన్ని కనికట్టు చేసేందుకు ఎన్నో స్ఫూఫింగ్ టూల్స్తో సమాజాన్ని విషపూరితం చేస్తున్నారు. ఇలా చేయడం దేశభక్తి కాదు.. దేశద్రోహం !
