సూపర్ స్టార్ మహేష్ తన తండ్రికి ప్రతి ఏటా పుట్టినరోజు శుభాకాంక్షలు తెలుపుతూ తాను నటిస్తున్న సినిమా టీజర్ రిలీజ్ చేయడం ఎప్పటినుండో జరుగుతుందే.. అయితే ఈసారి సూపర్ స్టార్ అభిమానులకు మరింత వేడుక జరుపుకునేలా చేయనున్నాడు మహేష్. అంత సర్ ప్రైజ్ ఏంటా అని ఆశ్చర్యపోకండి.. ఇన్నాళ్లు టీజర్ తోనే శుభాకాంక్షలు తెలిపే మహేష్ ఈసారి బ్రహ్మోత్సవం సినిమాను సూపర్ స్టార్ కృష్ణ పుట్టినరోజు సందర్భంగా రిలీజ్ చేయనున్నారట.
టాలీవుడ్ స్టార్ హీరోల్లో తన సత్తా చాటుతున్న మహేష్ ఓవర్సీస్ లో ఏ హీరో సాధించని రికార్డ్స్ తన ఖాతాలో వేసుకుంటున్నాడు. పివిపి బ్యానర్ లో పరం వి పొట్లూరి నిర్మిస్తున్న బ్రహ్మోత్సవం సినిమాను శ్రీకాంత్ అడ్డాల దర్శకత్వం వహిస్తున్నాడు. సమంత, కాజల్, ప్రణితలు కథానాయికలుగా నటిస్తున్న ఈ సినిమాకు మిక్కి జె మేయర్ సంగీతం అందిస్తున్నారు.
మే మొదటి వారంలో సినిమా ఆడియోను రిలీజ్ చేసే ఆలోచనలో ఉన్నారట చిత్ర యూనిట్. మే 31న సూపర్ స్టార్ కృష్ణ పుట్టినరోజు సందర్భంగా రిలీజ్ చేసే ఆలోచనలో ఉన్నారట.. శ్రీమంతుడు సినిమాతో రికార్డ్స్ క్రియేట్ చేసిన సూపర్ స్టార్ మహేష్ బ్రహ్మోత్సవం మరోసారి సంచలన విజయం అందుకుంటాడనడంలో సందేహం లేదు. ఓ వైపు సూపర్ స్టార్ బర్త్ డే మరోవైపు మరో సూపర్ స్టార్ సినిమా రిలీజ్.. ఇలా రెండు పండుగలను ఒకేరోజు సెలబ్రేట్ చేసుకునేందుకు ఘట్టమనేని అభిమానులంతా సంసిద్ధమవుతున్నారు.
