మెగాస్టార్ అంటే మహేష్బాబుకి ముందు నుంచీ అభిమానమే. దాన్ని వీలైనప్పుడల్లా చాటుకొంటూనే ఉన్నాడు. ”తదుపరి మెగా స్టార్ మీరే అని జనాల నమ్మకం. మరి మీరేమంటారు..??” అనే ఓ ప్రశ్న మహేష్కి చాన్నాళ్ల క్రితమే ఎదురైంది. దానికి మహేష్ ఏం పొంగిపోలేదు. ”మెగాస్టార్ ఒక్కరే… అలా పిలిపించుకొనే అర్హత చిరంజీవిగారికే ఉంది” అని చిరుపై తనకున్న ప్రేమ బయటపెట్టాడు. ఇప్పుడూ అంతే. ”సూపర్ స్టార్ అనగానే మీకు గుర్తొచ్చే వ్యక్తి ఎవరు” అని అడిగితే.. తన తండ్రి పేరు చెప్పలేదు. ”చిరంజీవి, రజనీకాంత్” అంటూ మళ్లీ చిరు అభిమానిగానే మాట్లాడాడు.
”సినిమాలకు, వాటి ఫలితాలకూ అతీతంగా ప్రేమించే వ్యక్తులు కొంతమంది ఉంటారు. వాళ్ల సినిమా అనగానే ఓ పిచ్చితో చూడ్డానికి వెళ్లిపోతారు. అలాంటి ఇమేజ్ దక్కించుకోవడం చాలా కష్టం. తెలుగులో చిరంజీవి గారికీ, తమిళంలో రజనీకాంత్ గారికీ ఆ హోదా దక్కింది” అంటూ నిజాయతీగా తన మనసుని ఆవిష్కరించాడు. మహేష్ మాటలకు మెగా అభిమానులు మొత్తం మురిసిపోతున్నారు. మహేష్ వాళ్ల మనసుల్ని నూటికి నూరు పాళ్లూ గెలుచుకొన్నాడు. రాబోయే `స్పైడర్` కి… ఈ మాటలు మేలు చేస్తాయన్నది విశ్లేషకుల మాట. అయితే.. మహేష్ ఏం తన స్వార్థం కోసం ఇలాంటి కామెంట్లు చేయలేదు. నిజంగానే తన మనసులో ఉన్న మాటల్ని ఆవిష్కరించాడు. ఆ విషయంలో మహేష్ నిజాయతీని శంకించాల్సిన అవసరం లేదు.
