టాప్ స్టార్ల పుట్టిన రోజంటే ఆ హడావుడి మామూలుగా ఉండడం లేదు. ఫస్ట్ లుక్ అనో, టీజర్ అనో బోల్డంత హంగామా చేస్తుంటారు. దాంతో ఫ్యాన్స్ ఉత్సాహాం రెట్టింపు అవుతుంది. మహేష్ బాబు పుట్టిన రోజుకీ ఆ సందడి ఉంటుందని భావించారు అభిమానులు. గతేడాది మహేష్ బర్త్డేకి.. శ్రీమంతుడు విడుదలైంది. ఈసారీ అలాంటి హంగామా ఏదో ఉంటుందని భావించారు. మురుగదాస్ సినిమాకి సంబంధించిన పోస్టరో, ఫస్ట్లుక్కో విడుదల అవుతుందని ఆశ పడ్డారు. కానీ.. అదే జరగలేదు. ఎప్పట్లానే గప్ చుప్గా.. ఈ పుట్టిన రోజూ గడిచిపోతోంది. దాంతో ఫ్యాన్స్ బాగా ఫీలవుతున్నారు.
మహేష్ – మురుగదాస్ సినిమా ఇటీవలే పట్టాలెక్కింది. మహేష్ కూడా ఆలస్యంగా జాయిన్ అయ్యాడు. దాంతో ఫస్ట్ లుక్ని విడుదల చేసేంత టైమ్ దొరకలేదు. ఏప్రిల్ – మేలలో ఈ సినిమా మొదలవ్వాల్సింది. అలా జరిగితే… ఈరోజు టీజర్ బయటకు వచ్చేసేది. కానీ ఆలస్యంగా మొదలవ్వడం వల్ల బర్త్డే సెలబ్రేషన్లు లేకుండా పోయాయి. హడావుడిగా లుక్ని బయటకు తీసుకురావడం కంటే, పక్కా ప్లాన్ ప్రకారమే పబ్లిసిటీ ప్లాన్ చేయాలని మురుగదాస్ భావిస్తున్నారట. అందుకని ఫస్ట్ లుక్ విషయంలో కంగారు పడలేదని టాక్. సెప్టెంబరులో చెన్నై షెడ్యూల్ పూర్తయ్యాకే.. ఫస్ట్ లుక్ విడుదల చేస్తారని తెలుస్తోంది. అప్పటి వరకూ ఆగాల్సిందే.
