హైదరాబాద్: తెలుగుదేశంపార్టీ జాతీయ ప్రధాన కార్యదర్శి నారా లోకేష్ ఇవాళ హైదరాబాద్ నగరంలో గ్రేటర్ ఎన్నికల ప్రచారంలో పాల్గొన్నారు. ఈ సందర్భంగా రోడ్ షోలలో మాట్లాడుతూ తెలంగాణ ఐటీ మంత్రి కేటీఆర్‌పై లోకేష్ విమర్శనాస్త్రాలు సంధించారు. కేటీఆర్‌ను ఉద్దేశించి, “అన్నా, నీ తాత హైదరాబాద్‌ను అభివృద్ధి చేసినాడా, మీ నాన్న హైదరాబాద్‌ను అభివృద్ధి చేసినాడా, మీ పార్టీ హైదరాబాద్‌ను అభివృద్ధి చేసినాదా అని ఈ బహిరంగ సభా ముఖంగా అడుగుతున్నా. వాస్తవమే, ఆనాడు మా తాత స్వర్గీయ నందమూరి తారక రామారావుగారు హైదరాబాద్‌ను అభివృద్ధి చేసినారు, అదేవిధంగా మా నాన్న చంద్రబాబునాయుడుగారు అభివృద్ధి చేశారు” అని లోకేష్ అన్నారు. బెంగళూరు, హైదరాబాద్‌ నగరాలలో ఒకేసారి మెట్రో పనులు ప్రారంభమయ్యాయని, అయితే బెంగళూరులో మెట్రో ప్రాజెక్ట్ పూర్తయిందని, ఇక్కడ మాత్రం ఇంకా పూర్తి కాలేదని విమర్శించారు. టీడీపీ-బీజేపీ గెలిస్తే కేంద్రం నుంచి గల్లీకి నిధులు వస్తాయన్నారు. ముసలి మంత్రులు ప్రచారానికి వస్తారని, నడుము నొప్పి రాకూడదని హడావుడిగా నగరంలో కొన్ని రోడ్లు వేశారని లోకేష్ ఎద్దేవా చేశారు. టీడీపీ కన్‌స్ట్రక్షన్ పార్టీ అని, టీఆర్ఎస్ డిస్ట్రక్షన్ పార్టీ అని చెప్పారు.