అందాల రాక్షసి తరవాత.. ఒక్కసారిగా ఫేమ్ తెచ్చేసుకొంది లావణ్య త్రిపాఠీ. యువ హీరోల సరసన మంచి ఆప్షన్గా మారింది. వరుస అవకాశాలతో… క్షణం కూడా తీరిక లేకుండా గడిపింది. ఆ ప్రయాణంలో లావణ్యకు విజయాలూ వరించాయి. అయితే… ఈమధ్య లావణ్యకు బాగా గ్యాప్ వచ్చేసింది. దాంతో లావణ్య సైడ్ అయిపోయిందనుకొన్నారు. ఓ యువ హీరోతో ప్రేమాయణం నడుపుతోందని, త్వరలో పెళ్లి కూడా అంటూ… వార్తలు షికారు చేశాయి.
అయితే ఇప్పుడు లావణ్య మళ్లీ రేసులోకి వచ్చింది. వెబ్ సిరీస్లూ, సినిమాలూ అంటూ రెండు పడవల ప్రయాణం చేస్తోంది. తెలుగుతో పాటు తమిళంలోనూ కొత్త ప్రాజెక్టులపై సంతకాలు చేసింది. కోన వెంకట్ దర్శకత్వంలో `పులి మేక` అనే ఓ వెబ్ సిరీస్ రూపొందుతోంది.ఇందులో లావణ్యనే కథానాయిక. జీ 5లో ఈ వెబ్ సిరీస్ ప్రసారం కాబోతోంది. పీపుల్స్ మీడియా ఫ్యాక్టరీ లో మంజునాథ దర్శకుడిగా ఓ లేడీ ఓరియెంటెడ్ సినిమా రూపుదిద్దుకొంటోంది. ఇందులో లావణ్యనే హీరోయిన్. తను నాయికా ప్రాధాన్యం ఉన్న సినిమా చేయడం ఇదే తొలిసారి. దాంతో పాటు ఓ తమిళ సినిమా కూడా ఒప్పుకొంది. ఇది కూడా లేడీ ఓరియెంటెడ్ కథే అని సమాచారం. మొత్తానికి లావణ్య ఇప్పుడు మళ్లీ ఫామ్ అందుకొంది. ఈ స్పీడ్ లోనే ఒక హిట్టు పడిపోతే… లావణ్య ఇంకొన్నాళ్లు బిజీ అయిపోవడం ఖాయం.
