స్టార్ డమ్ మోయడం అంత సులభం కాదు. స్టార్ కిడ్ అనేది కూడా ముళ్ల కిరీటమే. పోలికలు మొదలైపోతాయి. అంచనాలు పెరిగిపోతాయి. అభిమానుల ఆశలు నెరవేర్చడం, వాళ్ల అంచనాలకు తగినట్టుగా రాణించడం అంత సులభం కాదు. ఆ కష్టం ఎలా ఉంటుందో శ్రీదేవి కుమార్తెలకు త్వరగానే అర్థమైంది.
శ్రీదేవికి ఇద్దరు కుమార్తెలు. ఒకరు జాన్వీ, ఇంకొకరు ఖుషి. జాన్వి కథానాయికగా తనని తాను రుజువు చేసుకునే ప్రయత్నాల్లో ఉంది. ఖుషి కూడా త్వరలోనే వెండి తెరపై అడుగులు వేయడానికి సిద్ధపడుతోంది. ఈలోగా నటనలో శిక్షణ తీసుకుంటోంది. అయితే ఖుషికి ఆదిలోనే హంస పాదు అన్నట్టు విమర్శల తాకిడి ఎక్కువైంది. చాలామంది `నువ్వు మీ అమ్మలా అందగత్తెవి కావు. కనీసం అక్కలా ఆకర్షించే రూపం కూడా లేదు` అని డైరెక్టుగానే కామెంట్లు చేసేసరికి బాగా హర్టయిపోయింది.
అందుకనే…. ఖుషి ఓ ఆడియో ఫైల్ని తన ఇన్స్ట్రా లో ఉంచింది. అందులో తన అనుభవాలు, బాధలూ అభిమానులతో పంచుకుంది. చాలామంది తనని ప్రేమిస్తున్నారని, లెక్కకు మించిన అభిమానం చూపిస్తున్నారని, అదంతా తనకు చాలా సంతోషాన్ని కలిగిస్తోందని, అయితే కొంతమంది లేనిపోని పోలికలు తీస్తున్నారని, అమ్మలా లేవు, అక్కలా లేవు అంటూ జోకులు వేస్తున్నారని బాధ పడిపోయింది. రూపలావణ్యాలు వేసుకునే దుస్తుల్ని, ప్రవర్తించే విధానాన్ని బట్టి మారిపోతాయని, తనకంటూ ఓ వ్యక్తిత్వం, గుర్తింపు కోసం ప్రయత్నిస్తున్నానని, వాటిని తన ప్రతిభతో సాధించుకోవడానికి శ్రమిస్తానని తన అభిమానులకు మాటిచ్చింది. అభిమానుల ప్రేమ ఓ బహుమతి లాంటిదని, అయితే దాన్ని అందుకునే అర్హత తనకు ఉందో లేదో తెలీదని, కానీ ఆ అర్హత సాధించడానికి ప్రయత్నిస్తానని అభిమానులకు మాటిచ్చింది.
