తెలంగాణ రాజకీయాల్లో అనూహ్యమైన మార్పులు ఖాయంగా కనిపిస్తున్నాయి. ముఖ్యమంత్రి కేసీఆర్ కుమారుడు…కేటీఆర్ పట్టాభిషేకానికి మెల్లగా రంగం సిద్ధమవుతోందన్న ప్రచారం జరుగుతోంది. కేసీఆర్ ఎక్కువగా ఫాంహౌస్కే పరిమితమవుతున్నారు. పాలనా వ్యవహారాలన్నీ ఇప్పటికే కేటీఆర్ చూస్తున్నారు. చురుగ్గా పర్యటిస్తున్నారు. సమావేశాలు నిర్వహిస్తున్నారు. తాజాగా ” డమ్మీ” కేబినెట్ భేటీని కూడా నిర్వహించారు. ఇక ముఖ్యమంత్రిగా బాధ్యతలు చేపట్టడానికి తాను పూర్తిగా సిద్ధంగా ఉన్నానన్న సంకేతాలను పంపేశారు.
సీఎం కేసీఆర్ ఏం చేయాలనుకున్నా.. ఓ పద్దతి ప్రకారం చేస్తారు. ముందుగా ప్రజల్లోకి సందేశం పంపుతారు. ప్రజల్లో వచ్చే రియాక్షన్ను బట్టి తదుపరి అడుగులు వేస్తారు. ఆ సందేశాన్ని కేటీఆర్ విషయంలో చాలా కాలంగా పంపుతున్నారు. మొదటి సారి ముఖ్యమంత్రిగా ఉన్నప్పుడే.. కేటీఆర్కు బాధ్యతలిస్తారని ప్రచారం చేశారు. ప్లీనరీలో తీర్మానం చేయబోతున్నారని చెప్పుకున్నారు. అప్పటి నుంచి ఏదో ఓ సందర్భంలో కేసీఆర్ జాతీయ రాజకీయాలపై దృష్టి పెట్టి.. కేటీఆర్కు బాధ్యతలివ్వబోతున్నారని ప్రచారం జరుగుతూనే ఉంది. కేసీఆర్ అనుకున్నప్పుడల్లా.. ఈ ప్రచారం జరుగుతోంది. అంటే.. ఓ విధంగా.. కేసీఆర్ ఎప్పుడైనా వైదొలిగి.. కేటీఆర్కు బాధ్యతలివ్వొచ్చు అని ప్రజల్లో.. టీఆర్ఎస్ క్యాడర్నూ మానసికంగా సిద్ధం చేస్తున్నారని అనుకోవాలి. ఆ ప్రక్రియ ఇప్పుడు చివరి దశకు వచ్చినట్లుగా అనుకోవచ్చు.
ప్రస్తుతం తెలంగాణ కొత్త సెక్రటేరియట్ అన్ని హంగులతో.. తెలంగాణ సాంస్కృతిక వైభవం కళ్లకు కట్టినట్లుగా సిద్ధమవబోతోంది. ఆరు నెలల్లో… ఆ నిర్మాణాన్ని పూర్తి చేయాలని ప్రభుత్వం లక్ష్యంగా పెట్టుకుంది. బహుశా.. కొత్త సెక్రటేరియట్లో సీఎంగా బాధ్యతలు తీసుకుని కేసీఆర్ కాదని.. కేటీఆర్ అని.. అందుకే.. ఇప్పుడు కేటీఆర్ మరింత యాక్టివ్గా ఉన్నారని అంటున్నారు. కేసీఆర్ మదిలో ఏముందో కానీ టీఆర్ఎస్ నేతలు మాత్రం… ఖచ్చితంగా మార్పు ఉంటుందని భావిస్తున్నారు. అందుకే పోటీ పడి.. కేటీఆర్ను ప్రసన్నం చేసేందుకు ప్రయత్నిస్తున్నారు. మొన్నటి పుట్టిన రోజు వేడుకల్లోనే ఆ విషయం తేట తెల్లమయింది. ఖచ్చితంగా రాబోయే రోజుల్లో.. కేటీఆర్ మరింత కీలకమైన బాధ్యతల్లోకి వెళ్లడం ఖాయమనే అభిప్రాయం అందరిలోనూ ఏర్పడుతోంది.
