త్రివిక్రమ్ – ఎన్టీఆర్ సినిమా వాయిదా పడడంతో, ఎన్టీఆర్ – కొరటాల శివ సినిమాకి గ్రీన్ సిగ్నల్ వచ్చినట్టైంది. ఆఘమేఘాల మీద… ఈ సినిమాకి సంబంధించిన ప్రకటన వచ్చేసింది. `ఆర్.ఆర్.ఆర్` తరవాత.. ఎన్టీఆర్ – కొరటాల కాంబో ఫిక్సయిపోయింది. అయితే.. విచిత్రం ఏమిటంటే.. కొరటాల దగ్గర ఎన్టీఆర్ కి సరిపడ కథే లేదిప్పుడు. దాన్ని వండాలి.
`ఆచార్య` తరవాత… బన్నీతో ఓసినిమా చేయాలి కొరటాల. ఆ సినిమాకి సంబంధించిన లైన్ ఎప్పుడో అనేసుకున్నారు కూడా. దానికి సంబంధించిన స్క్రిప్టు కూడా దాదాపుగా ఓ కొలిక్కి వచ్చింది. అయితే దాన్ని పక్కన పెట్టి, ఎన్టీఆర్ కోసం కథ అల్లుకోవాల్సిన పరిస్థితి వచ్చింది. కొరటాల దగ్గర `లైన్స్`కి కొదవలేదు. బేసిగ్గా.. ఆయన ఓ రచయిత. `నా దగ్గర పది కథలు సిద్ధంగా ఉన్నాయి` అని కొరటాల ఇది వరకే చెప్పారు. అందులో సగం తీసేశారు కూడా. కానీ మిగిలిన సగంలో ఎన్టీఆర్ కి సూటయ్యే కథ లేదు. ఇప్పుడు ఎన్టీఆర్ కోసం.. వండి వార్చాలి. అయితే మహేష్, ప్రభాస్ ల కోసం కొన్ని లైన్లు కొరటాల సిద్ధం చేసుకున్నారు. వాటిలో ఒకదాన్ని ఎన్టీఆర్ కి సూటయ్యేలా మార్చుకోవాలి. కొరటాలకు అదేమంత కష్టమైన విషయం కాదు. కాకపోతే.. కేవలం కొరటాలపై ఉన్న నమ్మకం, ట్రాక్ రికార్డు కారణంగా.. కొరటాల కథేం చెప్పకపోయినా, ఈ ప్రాజెక్టుకి గ్రీన్ సిగ్నల్ ఇచ్చేశాడు ఎన్టీఆర్.
