తెలంగాణ కాంగ్రెస్ అసంతృప్త నేత కోమటిరెడ్డి వెంకటరెడ్డికి ఏదీ కలసి రావడం లేదు. ఆయన పార్టీని ధిక్కరించిన ప్రతీ సారి .. తగ్గాల్సి వస్తోంది. తాజాగా ఆయన .. రేవంత్ రెడ్డి పార్టీలో చేర్చిన తెలంగాణ ఉద్యమ నేత చెరుకు సుధాకర్ ను చంపుతానని బెదిరించి విమర్శలు ఎదుర్కొంటున్నారు. టీపీసీసీ ఉపాధ్యక్షుడిగా పదవి కూడా పొందిన చెరుకు సుధాకర్ నల్లగొండ జిల్లాలో చురుకుగా తిరుగుతున్నారు. ఈయనను మొదటి నుంచి కోమటిరెడ్డి వ్యతిరేకిస్తున్నారు. పార్టీలో చేర్చుకోవడాన్ని కూడా అగీకరించలేదు. కానీ హైకమాండ్ చేర్చుకుంది.
ఇప్పుడు ఆయన కాంగ్రెస్ పార్టీలో ఉంటే చంపేస్తామన్నట్లుగా కోమటిరెడ్డి బెదిరిపులకు పాల్పడుతున్నారు. చెరుకు సుధాకర్ కుమారుడు ఆస్పత్రి నిర్వహిస్తున్నారు. ఆయనకు ఫోన్చేసి తన అనుచరులు చంపేస్తారంటూ బెదిరింపులకు పాల్పడ్డారు. చెరుకు సుధాకర్ ను చంపేందుకు తన అనుచరులు వంద కార్లలో తిరుగుతున్నారని, వారం కంటే ఎక్కువ రోజులు బతకడం కష్టమంటూ సుధాకర్ కొడుకు సుహాస్కు ఫోన్ చేసి కోమటిరెడ్డి వార్నింగ్ ఇచ్చారు. ఈ ఆడియో వైరల్ అయింది. ఈ ఫోన్ కాల్ లో కోమటిరెడ్డి ఇష్టమొచ్చినట్లు తిడుతున్నట్లు ఉంది.
కోమటిరెడ్డి వ్యవహారం వైరల్ అయింది. చంపుతానని బెదిరించడం తీవ్రమైన విషయం కావడంతో పార్టీ హైకమాండ్ దృష్టికి ఈ విషయం తీసుకెళ్లారు. దీంతో కోమటిరెడ్డి తప్పయిపోయిదంని అంగీకరించక తప్పలేదు. తాను భావోద్వేగంతో చేసిన వ్యాఖ్యలను కొంత మంది అలా వక్రీకరించారని చెప్పారు. తన మాటలను కట్ చేసి, మార్ఫింగ్ చేశారని చెప్పుకొచ్చారు. గతంలో ఓ సారి చెరుకు సుధాకర్పై పోలీసులు పీడీ యాక్ట్ పెడితే తానే కొట్లాడానని గుర్తు చేసుకున్నారు. తనపై విమర్శలు వద్దనే సుధాకర్ కుమారుడికి చెప్పానని అన్నారు. ఫోన్ రికార్డు చేస్తున్న విషయం కూడా తనకు తెలుసని వెంకటరెడ్డి చెబుతున్నారు.
