విజయవాడ బందరు రోడ్డులో నిర్మించిన సూపర్ స్పెషాలిటీ పశువుల ఆసుపత్రికి ఇవ్వాళ్ళ మంత్రి ప్రత్తిపాటి పుల్లారావు ప్రారంభించారు. ఈ కార్యక్రమానికి మంత్రులు దేవినేని ఉమామహేశ్వరరావు, మాజీ ఎంపి నందమూరి హరికృష్ణ, స్థానిక తెదేపా నేతలు, కార్యకర్తలు చాల భారీ సంఖ్యలో హాజరయ్యారు. ఇంతవరకే అయితే అందులో విశేషమేమీ లేదు. కానీ నందమూరి హరికృష్ణ కారులో నుంచి గుడివాడ వైకాపా ఎమ్మెల్యే కొడాలి నాని కూడా దిగడంతో అందరూ షాక్ అయ్యారు. అంతే కాదు..ఆయనతో బాటు దేవినేని నెహ్రూ కుమారుడు దేవినేని అవినాష్ కూడా ఈ కార్యక్రమానికి హాజరవడం మరో విశేషం. దేవినేని అవినాష్ త్వరలో తెదేపా చేరడానికి నిశ్చయించుకొన్నట్లు తాజా సమాచారం. తెదేపా తీవ్రంగా వ్యతిరేకిస్తున్న కొడాలి నాని, ఈ కార్యక్రమానికి హరికృష్ణ కారులోనే రావడంతో ఆయన కూడా త్వరలోనే మళ్ళీ తెదేపాలోకి తిరిగి వచ్చేయబోతున్నారనే సందేహాలు వ్యక్తం అవుతున్నాయి. కొడాలి నానికి నందమూరి కుటుంబంలో హరికృష్ణతో ఆయన కుమారుడు జూ.ఎన్టీఆర్ తో నేటికీ సత్సంబందాలే ఉన్నాయి. కనుక హరికృష్ణ చొరవ తీసుకొని కొడాలి నానిని మళ్ళీ తెదేపాలోకి రప్పించే ప్రయత్నాలు చేస్తున్నారేమోననే అనుమానం కలుగుతోంది. అయితే తను కేవలం హరికృష్ణ మీద అభిమానంతో ఆయనను కలిసేందుకే వచ్చేనని కొడాలి నాని చెప్పారు. తన రాకకు ఎటువంటి రాజకీయ ఉద్దేశ్యాలు లేవని స్పష్టం చేసారు. కానీ సాధారణంగా ఎవరయినా పార్టీ మారే ముందే ఈవిధంగా బయటపడుతుంటారు కనుక కొడాలి నాని కూడా త్వరలోనే వైకాపా నుంచి జంప్ అయిపోతారేమో? ఒకవేళ అదే జరిగితే జగన్మోహన్ రెడ్డికి ఇది మరో పెద్ద షాక్ అవుతుంది.
