నిఖిల్ కెరీర్‌లో పెద్ద మ‌లుపు.. హ్యాపీడేస్‌. ఆ సినిమాతో హ్యాపీగా హీరోగా సెటిల్ అయిపోయాడు. మ‌ధ్య‌లో కొన్ని ఫ్లాపులు అందుకున్నా… వ‌రుస విజ‌యాల‌తో దూసుకెళ్తున్నాడు. ఇప్పుడు తాను చేస్తున్న సినిమా `కిరాక్ పార్టీ`. శ్ర‌వ‌ణ్ కొప్పిశెట్టి ద‌ర్శ‌క‌త్వం వ‌హించిన ఈ చిత్రాన్ని ఏకె ఎంట‌ర్‌టైన్‌మెంట్స్ సంస్థ రూపొందిస్తోంది. ఈరోజు టీజింగ్ టీజ‌ర్‌ని విడుద‌ల చేసింది చిత్ర‌బృందం. టీజ‌ర్ చూస్తుంటే మ‌రోసారి హ్యాపీ డేస్ గుర్తుకురావ‌డం స‌హ‌జం. కాలేజీ నేప‌థ్యంలో సాగే క‌థ ఇది. కాలేజీ అల్ల‌రి, స్నేహం, ప్రేమ‌, వీటితో పాటు రాజ‌కీయాలు కూడా చూపిస్తున్నారు. నిఖిల్ రెండు ర‌కాల గెట‌ప్పుల్లో క‌నిపిస్తున్నాడు. అయితే హ్యాపీడేస్‌కి కాస్త మాస్ ట‌చ్ ఇచ్చిన లుక్ టీజ‌ర్‌లో క‌నిపిస్తోంది. కొన్నిచోట్ల నిఖిల్ మ‌రీ ర‌గ్గ‌డ్‌లుక్‌లో ద‌ర్శ‌న‌మిస్తున్నాడు. ఈమ‌ధ్యే మ‌నం ప్రేమ‌మ్ చూశాం. ఆ ఫ్లేవ‌ర్ కూడా ఈ సినిమాలో ఉంటుందేమో అనిపిస్తోంది. మొత్తానికి యూత్ కోసం స్పెష‌ల్‌గా డిజైన్ చేసిన సినిమా అనే భావ‌న తీసుకురావ‌డంలో చిత్ర‌బృందం విజ‌య‌వంత‌మైంది. కాలేజీ బ్యాక్ డ్రాప్‌లో సినిమా వ‌చ్చి చాలా రోజులైంది. అన్నీ కుదిరితే… ఈ కిరాక్ పార్టీ నిఖిల్‌కి మ‌రో హ్యాపీడేస్ కావొచ్చు.